Жамоатчилик назоратининг навбатдаги ғалабаси

​​Жамоатчилик назоратининг навбатдаги ғалабаси

Норматив-ҳуқуқий ҳужжатлар лойиҳалари муҳокамаси порталига Марказий банк ва Солиқ қўмитасининг «Солиқ қарзини жисмоний шахсларнинг банк пластик карталаридан сўзсиз ундириш тартиби тўғрисидаги низомни тасдиқлаш тўғрисида»ги қарори лойиҳаси жойлаштирилган эди.

Бу қарор ўз навбатида мулк дахлсизлигига оид конституциявий қонунларга зид тартиб эди. Чунки пластик картадаги маблағлар фуқароларнинг мулки, у фақат суд қарори билангина мажбурий олиб қўйилиши мумкин.

Ушбу қарор лойиҳаси эълон қилингандан сўнг, ижтимоий тармоқларда кескин қаршиликларга учради. Мақолалар чоп этилди, постлар ёзилди, изоҳлар қолдирилди, қарор лойиҳасининг ўзига ҳам порталда кўплаб эътирозлар билдирилди.

Шундан кейин бирин-кетин қизиқ ишлар рўй берди.

Биринчидан, лойиҳа 17 декабрда муҳокама қўйилган бўлса, Марказий банк 19 декабрь куни Телеграмдаги расмий канали орқали бу лойиҳага эътирозларини билдирди. Баёнотда мазкур қарор лойиҳасини қонун ҳужжатларига, хусусан Фуқаролик кодекси нормаларига мувофиқлигини таъминлаш лозимлиги таъкидланди. «Қандай эзгу мақсад кўзланган бўлишидан қатъий назар, идоравий манфаатлар бошқа тармоқлар ёки бутун мамлакат иқтисодиёти ривожланишига салбий таъсир етказмаслиги зарур», - дейилди баёнотда.

Ваҳоланки, порталга жойланган қарор лойиҳасида муаллиф сифатида Марказий банк ҳам кўрсатилганди. Лекин Марказий банкнинг ўзи “биз бундай қарорга қаршимиз” дегани кўпчиликни ҳайрон қолдирди.

Лекин бир нарсани тан олиш керак, Марказий банкнинг бундай муносабати кўпчиликни қувонтиргани рост. Оддийгина 3 та хатбошидан иборат баёнот бўлса ҳам, лекин бу шаффофлик учун тарихий қадамлардан бири бўлди, десам, унчалик муболаға бўлмас. Давлат органлари ими-жимида эмас, омма олдида бир-бирига эътирозларини билдириши қандай ажойиб.

Иккинчидан, 2018 йил 26 декабрдаги ПҚ-4086-сонли Президент қарори асосида 2018 йил 26 июнда қабул қилинган бошқа бир ПҚ-3802-сонли Президент қарорига ўзгариш киритилиб, 7-банди 5-хатбошиси чиқариб ташланди. Бу қуйидагича банд эди:

«юзага келган солиқ қарздорлигини солиқ тўловчи-жисмоний шахсларнинг пластик карталарига хизмат кўрсатувчи банк ҳисобварақларидан ойига энг кам ойлик иш ҳақининг икки баравари миқдоридан кўп бўлмаган суммада сўзсиз ҳисобдан чиқариш».

Демак, ушбу банд ҳозирда ўз кучини йўқотди. Ва бу ўзгариш ҳам айнан ижтимоий тармоқлардаги норозиликлардан кейин бўлгани эътиборга молик.

Учинчидан, 8 январь куни Давлат солиқ қўмитаси баёнот берди. Унда айтилишича, мазкур қарор лойиҳаси бўйича кенг жамоатчилик томонидан билдирилган эътироз ва таклифлар ўрганилганда, лойиҳа пухта тайёрланмаганлиги, Давлат солиқ қўмитаси раҳбариятининг таклифлари ва тавсияларини инобатга олинмасдан ҳамда келишилмасдан Ягона интерактив давлат хизматлари порталига жойлаштирилганлиги аниқланган (менимча, ДСҚ Ягона портал деганда НҲҲ лойиҳалари муҳокамалари порталини назарда тутган, иккаласи бошқа-бошқа портал).

Ва лойиҳани ишлаб чиқилишида йўл қўйган камчиликлар ва масъулиятсизлиги учун ДСҚнинг масъул бошқарма бошлиғи эгаллаб турган лавозимидан озод этилган.

Баёнот «Давлат солиқ қўмитаси томонидан Низом лойиҳаси қайтадан кўриб чиқилмоқда ҳамда унда жисмоний шахсларнинг банк карталаридан маблағларни ундириш фақатгина уларнинг розилиги асосида амалга оширилиши белгиланади», - дея якунланган.

Хулоса

Мана шунақа гаплар. Жамоатчилик назорати орқали инсон ҳуқуқлари поймол бўлиши мумкин бўлган ҳолатнинг олди олинди. Агар ҳеч ким эътироз билдирмаганда, «ҳаммаёқ танқидга тўлиб кетди, Сизлар фақат тирноқ орасидан кир қидирасизлар, бизда мусаффо осмон-ку» деган одамларнинг қараши билан иш қилинганда эди, жиддий салбий оқибатлар келтириб чиқарадиган қарор тасдиқланиб кетармиди...

Хуллас, ҳаммаси яхшиликка. Давлат органлари халқни эшитишмоқда, фуқаролар жамият ва давлат ишларини бошқаришда бевосита ҳамда билвосита иштирок этишда фаоллашмоқда. Бу катта нарса! Илоҳим, яхшиликлар бардавом бўлсин.

Каналга уланиш: 👇
https://t.me/joinchat/AAAAAEe1KDC7Hm03UPVooQ