Бўзда милиция ходими фуқарони ургани бўйича изоҳ берилди
Manba:Daryo — LIVE
Бўзда милициядан калтак еган йигитнинг отаси милиционерни эмас, балки бу воқеани видеога олган шахсни жазолашни сўради
Андижон вилояти ИИБ Бўз тумани ички ишлар ходимлари камида бир фуқарони ҳақоратлаб, унга қўл кўтаргани ҳолати бўйича «Дарё»га изоҳ маълумот берди. Тўғриси, жуда қизиқарли ахборот (ва биз Андижондан шунга ўхшаш ахборотлар келишига ўрганиб қолганмиз, ҳайрон бўлганимиз йўқ).
Маълум бўлишича, воқеа 15 июль куни тунги соат 23:30 ларда Бўз туман Бўстон маҳалласида яшовчи 20 яшар Муҳриддин Маъруфжонов билан содир бўлган. Андижон вилояти ИИБ ахборотига кўра, Муҳриддин 15 июль куни тунги соат 23:30 ларда дўкондан ўзи яшайдиган хонадонга қўлида 250 минг сўм пул билан кетаётганида (ия, у 23:30 да уйига кетаётган бўлганми ёки ИИБ ходимидан калтак еганми?), ИИБ ходимлари томонидан ушланиб, шахсига ойдинлик киритиш мақсадида Бўз туман ИИБга олиб келинган.
Туман ИИБда профилактика инспектори лейтенант М.Парпиев (қариндошмасмикин?!) ўзини оғзаки таништиргач, Муҳриддиннинг отаси Музаффар Маъруповга қўнғироқ қилган (нега? Нега ахир? 20 яшар, Президент сайловида овоз бера оладиган, ҳатто дўкондан ўзи мустақил равишда сигарет ва алкоголь ичимлик сотиб олишга қонунан ҳақи бўлган кап-катта йигитнинг отасини безовта қилишга на ҳожат?).
Андижон вилоят ИИБ ахборотининг давоми даҳшат: «Фуқаро Музаффар Маърупов профилактика инспектори М.Парпиевга ҳақиқатдан ҳам Муҳриддин Маъруфжонов ўз ўғли эканлиги, бироқ кейинги вақтларда ўғли кўчадан кеч уйга кираётганлиги, отасини тартибга чақириш ҳақидаги ўгитларига қулоқ солмаётганлиги учун ички ишлар ходимидан ўғлини тартибга чақириб қўйишини сўрайди».
Шундан сўнг, Андижон вилоят ИИБ ахборотига кўра, профилактика инспектори М.Парпиев Муҳриддинни тартибга солиш мақсадида (қандай олижаноб мақсад!) тунги вақтларда кимлар билан ва нима мақсадда юрганлигини, нега отасининг сўзларига қулоқ солмаётганлиги ҳақида гапирган (мулоқот қандай мулойим ўтганини яхшироқ ҳис қилиш учун видеони кўринг).
Инспектор Муҳриддининг пакетидаги пулларни кўриб, «Пулларни қаердан олиб келаяпсан?» деб сўраганида, Муҳриддин унга «Ўзимнинг пулим, нима, пул билан юриб бўлмайдими?» деб, Андижон вилоят ИИБ изоҳича, қизиққонлик билан жавоб қайтарган (одатда шунақа ўзи — аҳмоқона саволларга қизиққонлик билан жавоб қайтарилади).
«Бунга жавобан ички ишлар ходими унинг ёқасидан ушлаб, бўлим ҳовлисидан ички ишлар биноси ичкарисига киришни талаб қилади», — деб ёзилган Андижон вилоят ИИБ ахборотида (шу жойи видеода сал бошқачароқ эди-да: Муҳриддин инспекторга «Сўкинишмасдан гапиринг», деганидан сўнг милиционер унга қўл кўтарган). Ҳикояни шу ерда тугатиб, профилактика инспектори М.Парпиевнинг ноқонуний хатти-ҳаракатлари бўйича қандай чора кўрилгани юзасидан аниқ ва тиниқ ахборот берса ҳам бўларди. Йўқ. Давоми бор.
Хуллас, жаҳлдор инспектор М.Парпиевни ҳамкасби Б.Шомирзаев тўхтатиб қолган (яхшиям!). Шундан сўнг Муҳриддиннинг шахсига оид маълумотлар ёзиб олиниб, у уйига олиб бориб қўйилган. Орадан икки кун ўтиб воқеа видеоси интернетга тарқалиб кетган (раҳмат, «Репост»!).
Супер-даҳшат қисми энди бошланяпти: Андижон вилоят ИИБ ходимлари Муҳриддиннинг отаси билан суҳбатлашганда, у ўғли билан содир бўлган воқеани тасдиқлаган, лекин туман ИИБ ходимларига ҳеч қандай эътирози йўқлигини айтган. «Бироқ ўғли билан боғлиқ ҳолатни видеотасвирга олиб тарқатган шахсга нисбатан қонуний чора кўриб беришни сўраган», — дейилади вилоят ИИБ ахборотида.
«Мазкур аниқланган ҳолатлар бўйича, ҳозирда Андижон вилояти ИИБ масъул ходимлари томонидан Бўз тумани ИИБ ходимларига нисбатан белгиланган тартибда хизмат текшируви ўтказилмоқда», — деб тугатилган Андижон вилоят ИИБ ахбороти.
