Cotton Campaign ўзбек пахтаси бойкотини бекор қилиши мумкин
Cotton Campaign: Ўзбекистон тўқимачилик маҳсулотларига қарши “бойкот”ни бекор қилиш мумкин
Ёдингиздами, ўтган йили сентябрь ойида АҚШ меҳнат вазирлигининг ўзбек пахтасига санкцияларни нима сабабдан бекор қилгани ҳақида кичик таҳлилий пост эълон қилгандим. Агар ҳали ўқимаган бўлсангиз, унда бир кўз югуртиришни тавсия қиламан.
https://t.me/xushnudbek/1067
Ўшанда АҚШ Меҳнат вазирлигининг «пахта амнистияси» аҳамияти жиҳатидан энг қувонарли хушхабарлардан бирилиги ва энди Ўзбекистон олдида «Cotton Campaign» (Коттон Кампейн) халқаро ташкилоти эълон қилган яна бир йирик санкцияни бекор қилиш вазифаси тургани ҳақида фикр билдиргандим.
Бугун Ташқи ишлар вазирлигида шу мавзуга оид бир хабар чиқди. 2019 йилнинг 4 февраль куни Бош вазир ўринбосари Танзила Норбоева бошчилигида Вашингтонга ишчи ташрифи билан борган делегация Ўзбекистон тўқимачилик маҳсулотларига қарши “бойкот” ташаббусчиси Cotton Campaign халқаро коалициянинг йиғилишида иштирок этган.
Йиғилишда ҳуқуқни муҳофаза қилиш ташкилотлари, ишлаб чиқарувчилар уюшмалари, ритейлерлар ва АҚШ касаба уюшма тузилмалари вакиллари қатнашган.
Cotton Campaign сайтида ҳам бу ҳақида катта хабар эълон қилинди, гарчи бизда уларнинг сайти блокланган бўлса-да, лекин VPN билан очади, бу ҳеч кимга муаммо эмаску ҳозир :).
Хабарда айтилишича, Ўзбекистон ҳукуматининг юқори мартабали вакиллари билан тарихида илк бор АҚШда музокаралар ташкил этилган. Музокараларда Танзила Камаловнадан ташқари, меҳнат вазири Шерзод Кудбиев, “Ўзтўқимачиликсаноат” уюшмаси раҳбари Илҳом Ҳайдаров ва АҚШдаги элчимиз Жавлон Ваҳобов ҳам иштирок этган.
“Ўзбекистон ҳукумати ўн йилликлар давомида авж олган мажбурий меҳнатни тугатиш мажбуриятини олгани бизни руҳлантиради ва биз ҳозирги кунга қадар амалга оширилмайдиган бу тарихий вазифанинг кўп жиҳатларига эътибор қаратмоқдамиз”, - деган Коттон Кампейн асосчиси Беннет Фреэман.
Мунозара кун тартибидаги энг асосий мавзулардан бири 310 та жаҳон бренди томонидан эълон қилинган “пахта бойкот”ини тўхтатиш масаласи эди.
Учрашувда бу бойкот доимий эмаслиги ва у қайта кўриб чиқилиши мумкинлиги қайд этилган. Шу нуқтаи назардан коалиция вакиллари 2019 йилги пахта мавсумида мажбурий меҳнатга чек қўйиш ишларида янада ўсишга эришишга умид билдиришган.
Албатта, мазкур хабар ҳам биз учун анчайин қувонарли. Ишонамизки, тез орада кўрилаётган чоралар ўз самарасини бериб, Ўзбекистон тўқимачилик саноатига ва пахтасига қўйилган санкциялар тўлиқ олиб ташаланади.
Бу икки томондан фойда: 1-дан, иқтисодий даромад, 2-дан, баҳонада халқ мажбурий меҳнат балосидан батамом қутилади.
Коттон Кампейн ўзи қанақа ташкилот эканлигига қизиққан бўлсангиз, унда мана бу ерда ташкилот ва унинг мақсади ҳақида имкон қадар тўлиқроқ маълумот беришга ҳаракат қилганман: https://t.me/xushnudbek/1068
Cotton Campaign сайтида айтилишича, ўша кунги йиғилишда Туркманистоннинг пахта саноати масаласи ҳам кўрилган. Коттон Кампейн расмийлари қўшниларимизда аҳвол анча ёмонлиги, шу сабабли кийим-кечак брендларидан туркман пахтасига бойкот элон қилиш сўралгани, бу борада 8 февраль куни Нью-Йоркда йирик инвесторлар иштирокида брифинг ўтказилгани таъкидланган. Ва хабар сўнггида Туркманистон мажбурий меҳнатга барҳам беришда қўшни Ўзбекистондан ўрнак олиши кераклиги алоҳида қайд этилган.
Каналга уланиш: 👇
https://t.me/joinchat/AAAAAEe1KDC7Hm03UPVooQ
