Давлат божи ставкаларига киритилган ўзгаришлар

​​10 ноябрдан давлат божи ставкаларига айрим ўзгаришлар киритилади

Ҳукуматнинг 2 ноябрдаги 904-сонли қарорига мувофиқ, давлат божи ставкаларига қўшимча ва ўзгаришлар киритилди.

👉 Эндиликда қуйидагилардан давлат божи ундирилмайдиган бўлди:

Фуқаролик ишлар бўйича судларда:
▪️ оталикни тан олиш (белгилаш), боланинг у ёки бу онадан туғилганлиги, шунингдек туғилган вақти фактларини аниқлаш тўғрисидаги аризаларни кўрганлик учун;

Нотариусларда:
▪️никоҳ шартномасини тасдиқлаганлик, унга ўзгартиришлар киритганлик ёки унинг амал қилишини тугатганлик учун;
▪️алимент тўлаш тўғрисидаги келишувни тасдиқлаганлик учун.

👉 Юридик шахслар тушунчасига аниқлик киритилди. Илгари фақат “юридик шахслар” дейилган бўлса, эндиликда тарафлардан бири юридик шахс бўлганда ҳам максимал ставкада бож ундирилади;

👉 Айрим шартномаларга ўзгартириш киритиш ёки шартномани бекор қилиш учун тўланадиган давлат божи миқдори аниқлаштирилди. Бунда:

Ижара шартномаси учун бож:
ўзгариш киритиш - тасдиқлаш билан бир хил;
бекор қилиш - тасдиқлашнинг 50%и.

Қарз шартномаси учун бож:
ўзгартириш киритиш ва бекор қилиш - тасдиқлашнинг 50%и.

Кафиллик шартномаси учун бож:
ўзгартириш киритиш ва бекор қилиш - тасдиқлаш билан бир хил.

👉 Меросга эгалик ҳуқуқи ҳақида гувоҳнома берганлик учун давлат божини ҳисоблаш тартиби ўзгарди, аниқроғи анча соддалаштирилди. Илгари ворисларнинг яқинлик даражаси бўйича мерос суммасининг 0,1% дан 2% гача бож ундирилар эди. Масалан, фарзандларга арзонроқ, бошқаларга қимматроқ, қиммат уйдан кўпроқ, арзон машинадан камроқ ва ҳ.к.

Эндиликда давлат божи мерос суммасидан қатъи назар ЭКИҲга боғлаб қўйилди. Яъни мерос кўчмас мулк ёки автомототранспорт воситаси бўлса (ҳар бири учун) ЭКИҲ 50% миқдорида, бошқа барча мол-мулклар учун ЭКИҲ 30% миқдорида бож ундириладиган бўлди;

👉 корхонани бошқа шахсга ўтказиш шартномаларни тасдиқлаганлик учун ЭКИҲ 1 баравари миқдорида давлат божи тўланиши алоҳида банд сифатида кўрсатилди;

👉 қоидага кўра, нотариал бинодан ташқарида бажарилган иш учун 2 баравар бож ундирилади, лекин киритилган ўзгаришга биноан, эндиликда фуқароларнинг ўзини ўзи бошқариш органлари биноларида нотариусларнинг сайёр қабуллари чоғида амалга ошириладиган нотариал ҳаракатлар учун 2 баравар эмас, одатдагидай бож тўланадиган бўлди.

Ушбу ўзгаришлар 10 ноябрдан кучга киради.

Каналга уланиш: 👇
https://t.me/joinchat/AAAAAEe1KDC7Hm03UPVooQ