Прописка яна ёпиладими: миш-мишларга ойдинлик киритилди

Прописка яна ёпиладими?

Одамлар бу гапни қаердан олган билмадиму, лекин ўзгаларнинг номида турган уйини тезроқ нотариусдан ўз номига ўтказиб олишга шошилаётган фуқаролар орасида шунақа гап юрган эмиш. Яъни «бу вақтинчалик акция, уйни тезроқ ўтказиб қолиш керак, йўқса яқинда яна пропискани ёпиб қўяди, биз ўтказа олмай қоламиз» деган миш-мишларни айтиб юришибди. Нотариуслар эса одам билан тўлиб кетган эмиш.

Балки карантин туфайли Тошкентга кириш-чиқиш ёпилиши мумкиндир, аммо буни пропискага ёхуд уй-жой олди-сотдисига умуман алоқаси йўқ.

Иккиламчи бозордан уй олишга рухсат бериш ҳақида Президент Фармони имзоланган. Фармонда фақат маълум пайтгача рухсат берилади, кейин яна тўхтатилади, деган гап йўқ. Бу тартибни ортга қайтариш учун яна битта Президент Фармони имзоланиши керак. Яъни пропискаси йўқ фуқароларнинг иккиламчи бозордан уй сотиб олишга рухсат берилиши, агар замон терс айланиб кетмаса, Худо хоҳласа умрбод амал қилади.

Шунинг учун ваҳима қилиб, "вақтинчалик экан бу, уйни тезроқ ўтказиб олайлик", деб кун бўйи тиқилинч навбатда туриб, соғлиғингизни хавф остида қолдирманг.

Бу мавзу бўйича муносабат билдирган адлия вазирлиги матбуот котибининг сўзларига кўра, Тошкентдаги кўчмас мулк олди-сотди шартномаларини расмийлаштириш учун фуқаролар айнан Тошкентдаги нотариусга келишлари шарт эмас. Республиканинг исталган ҳудудидаги нотариусга мурожаат қилса бўлади.

👉 @xushnudbek 👈