Жабрланувчининг шахсий маълумотлари ошкор қилиниши

Шахснинг қадр-қиммати ҳақида

Ёдингизда бўлса, Самарқандда бир аёлнинг бошига челак кийдириб урган йигитлар ушлангани ҳақида хабар бергандик. "Ёшлар" телеканали шу воқеа ҳақида репортаж тайёрлабди. Ушбу репортаж ички ишлар билан ҳамкорликда қилингани аниқ.

Мени хафа қилган жойи, репортажда калтак еган қария аёлнинг барча шахсий маълумотлари - туғилган йили, тўлиқ исм-шарифи ва унинг тиланчилиги (!) эълон қилиняпти. Барака топгурлар, видеода юзи ва кимлиги кўринмаган жабрланувчи аёлнинг шахсий маълумотларини ошкор қилишга Сизга ким ҳуқуқ берди?! Инсон шаъни ва қадр-қиммати деган нарсани биласизларми ўзи?

Ички ишлар ўтган сафар ҳам Каттақўрғонда ечинтирилган аёлнинг исм-шарифи ва маълумотларини сайтида эълон қилиб, норозиликлардан кейин олиб ташлаганди. Энди бу видео...

Аслида токи суд ҳукми чиқмагунгача, гумон қилинаётган ёки айбланаётган шахсларнинг исмларини, юзини, суратини ҳам эълон қилиш мумкин эмас. Майли, "қонунбузарликлар профилактикаси" деган шиор ортидан бу нарсага кўз юмишга ўрганиб қолдик. Лекин жабрланувчилар, айниқса видеодаги каби таҳқирланган инсонларнинг шахсий маълумотларини ошкор қилишга чидаб бўлмайди! Қандайин номақбул иш бу!

ОАВ ходимлари ва уларга маълумот бераётган давлат идоралари вакиллари, илтимос, бераётган хабарларингизда ўзгаларнинг шаъни ва қадр-қимматини камситувчи маълумотларни эълон қилишдан сақланинг. Эълон қилишдан олдин бир озгина уларнинг ўрнига ўзингизни қўйиб кўринг, шунда бу иш қанчалар оғир ботишини ҳис қиласиз.

Шу воқеа бўйича айрим қўшимча маълумотлар:

👉 Терговга Д.Б. исмли йигит ҳам жалб этилган, лекин уни ҳам безори сифатида талқин қилишмоқда. Ваҳоланки, у кампирни уриш воқеасида умуман иштирок этмаган. Д.Б. видеони бир неча ой ўтиб интернетга жойлаган холос. Аслида у видеони жойламаганда, бу воқеани ҳеч ким билмай қоларди. Аммо унинг қилмишида ҳам жиноят аломатлари бор ва унга нисбатан Жиноят кодексининг 140-моддаси 2-қисми билан, яъни нашр қилиш ва бошқача кўпайтирилган усулда ҳақорат қилиш моддаси билан жиноят иши қўзғатилган.

Буни нима учун айтяпман? Чунки қолганлар ҳам билиб қўйиши керак, кимнидир таҳқирловчи видеоларни, суратларни ва маълумотларни тарқатиш, гарчи ўша ишларни ўзингиз қилмаган бўлсангиз ҳам, жавобгарликка тортиш учун асос бўлади.

👉 Челак кийдирган Р. исмли йигит ҳам бор, мендаги маълумотларга кўра, ҳозирча у қидирувда экан. Шунда воқеа иштирокчилари қуйидагилар бўлади:
Ш.А. - урган
Р. - челак кийдирган
А.М. - видеога олган
Д.Б. - видеони Инстаграмга жойлаган

Каналга уланиш: 👇
https://t.me/joinchat/AAAAAEe1KDC7Hm03UPVooQ