Олий таълимда контракт нархлари қанчага ошди
Контрактлар ўтган семестрга қараганда қанчага ошди?
Тепада илова қилган жадвалимни кўпчилик бироз нотўғри тушунибди. Аниқроғи масалани мен яхши тушунтира олмабман.
Кўпчилик «Бизда контракт бошқача нарх эди» деб ёзишибди. Буни биламан. Аммо жадвалда устига чизилган рақамлар 1 сентябргача амалда бўлган контракт нархлари эмасди. Аксинча, 1 сентябрдан ошиши кутилаётган контракт нархлари эди.
Сабаби ўтган йилдан бошлаб, контракт нархлари иш ҳақига боғлаб қўйилди ва ҳар сафар ойликлар ошганда контрактлар ҳам қимматлашадиган бўлди. 1 августдан бошлаб иш ҳақлари 10%га ошди, демак 1 сентябрдан контрактлар ҳам 10%га ошиши аниқ эди.
Яъни Ҳукумат янги қарор қабул қилиб, контрактларни ўртача 18%га оширмаганида эди, контрактлар нархи жадвалда устига чизилган рақамлар кўринишида бўларди.
Масалан, агар контрактлар янада кўпроқ ошмаганда эди, унда Юридик институтнинг контрактлари нархи 1 сентябрдан 13 млн 380 минг сўм бўларди. Ҳозир эса 13 млн 967 минг сўм этиб белгиланди ва 587 минг сўмга кутилганидан кўпроқ қимматлади. Аслида эса ўтган семестрдаги контрактдан 1 млн 800 минг сўмга ошди.
Янада тушунарли бўлиши учун жадвалга қўшимча 2 та устун қўшдим. Ўтган семестрдаги контракт нархлари ва жорий семестрда қанчага ошганини кўришингиз мумкин.
Янги семестрда контрактлар 1 млн 670 минг сўмдан 2 млн 182 минг сўмгача ошган. Бу эса йўналишига қараб 15% дан 23%гача бўлган миқдорда ошганини билдиради.
Албатта, ҳозирги шароитда контрактлар қимматлиги, халқ қийналаётгани ҳақида эҳтиросли постлар ёзиш мумкин, бундан осони йўқ. Бундай постлар кўпчиликка мойдай ёқадиган, дардига оз бўлса-да малҳам бўладиган пайт ҳозир.
Лекин гап давлат бюджети, молиявий манбалар билан боғлиқ бўлгани учун масалага янада жиддийроқ ёндошишни талаб этмоқда, фақат интернетда ёзиш билан иш битмайди. Ўтган йилги Дипломатия воқеасини эсланг, контрактларни бир деганда 20 млндан қимматлаштириб қўйди, талабалар норозилик акциялари ҳам қилишди, якунда барибир фойда бўлмаганди.
Шу сабабли ишни пухтароқ қилиш, таҳлиллар ва асосли таклифларни тайёрлаш, мутасаддилар билан боғланиш бирмунча вақтни талаб этади. Йўқса ҳамма айтилган фикрлар деворга айтилган гапдек, зиғирча фойдаси бўлмаслиги мумкин. Контрактларни тўлаш муаммоси қай даражада минглаб оилаларни ўйлантираётганини ўтказилаётган акция мисолида кўриб, ҳис қилиб турибман.
👉 @xushnudbek 👈
