1-курс талабалари учун контракт тўлаш тартиби

❓1-курсга кирганлар контрактнинг 50%ини тўлаши керакми?

Менга шу ҳақда талабалар ва уларнинг ота-оналаридан жуда кўплаб саволлар келмоқда. Яъни аксарият ОТМлар 1-курсга тавсия қилинган талабаларга контрактнинг камида 50%ини тўлаши кераклигини, йўқса уларга талабаликка қабул қилиш ҳақида буйруқ чиқмаслигини, контрактни тўртга бўлиб тўлашга оид қоида фақат юқори курсларга тааллуқли эканлигини айтишаётган эмиш. Шу важ билан жорий йилда ўқишга кирганлардан контрактнинг 50%ини тўлаш талаб қилинмоқда.

Хўш, бу талабда қанчалик жон бор?

❗️ЖАВОБ: ОТМларнинг бундай талаби нотўғри.

Чунки Давлат қабул комиссиясининг қарорида қуйидагича қоида белгиланган:

“белгиланган тўлов миқдорининг камида 25 фоизини талабаликка тавсия этилган абитуриентлар учун 15 сентябргача ёки Давлат қабул комиссияси томонидан белгиланган муддатгача ҳамда иккинчи ва ундан кейинги босқич талабалар учун 1 октябргача ёки ОТМ ректори (филиал директори) томонидан узайтирилган муддатгача амалга оширилади”.

Бу ерда қорайтирилган матндан аниқ-равшан кўриниб турибдики, тўртга бўлиб тўлаш қоидаси 1-курсларга ҳам тааллуқли. Демак, 1-курслар ҳам 25% тўлаш ҳуқуқига эга ва улар 25% тўлаганда талабаликка қабул қилиш ҳақида ректор буйруғи чиқиши керак.

Шунингдек, айримларни 15 сентябрь санаси чалғитди, яъни тест жавоблар кеч чиқдику, энди биз муддатни ўтказиб юбордикми, дейишмоқда. Йўқ, ундай эмас. Жорий йил пандемия сабабли имтиҳонлар кеч ўтказилди, шу сабабли Давлат қабул комиссияси контракт тўлаш муддатини 1 ноябрга қадар узайтирди (юқоридаги тагига чизилган матнга қаранг).

Ушбу масала бўйича Олий таълим вазирлиги масъулларининг муносабатини ҳам сўрадим, улар ҳам буни тасдиқлашди. Ва алоҳида қайд этишдики, мазкур масала бўйича вазирлик томонидан барча ректорларга 1-курслар ҳам контрактнинг 25%ини тўлаш ҳуқуқига эга эканлиги ҳақида тушунтириш берилган.

ХУЛОСА: 1-курсга оддий контрактга кирганлар 1 ноябрга қадар 25% тўловни амалга оширса кифоя, уларга талабаликка қабул қилиш ҳақида буйруқ чиқарилади. Контрактни 50% ёки ундан кўпроқ тўлаш ихтиёрий, лекин мажбурий эмас.

Аммо супер-контрактда ўқимоқчи бўлганлар камида 50%ни 1 декабргача тўлаши керак.

👉 @xushnudbek 👈