Иккиламчи бозорда автомобилларни расмийлаштириш йиғими бекор қилиниши мумкин
Ваниҳоят: иккиламчи бозордан сотиб олинган автомобилни расмийлаштириш учун ундириладиган йиғимлар бекор қилиниши мумкин
Депутат Дониёр Ғаниевнинг хабар беришича, Молия вазирлиги томонидан 2022 йил бюджет параметрларини шакллантиришда автотранспорт воситаларини сотиб олганлик учун ундириладиган йиғимларни бекор қилиш кўзда тутилмоқда.
Иккиламчи бозордан сотиб олинган автомобилни ЙҲХХда рўйхатдан ўтказиш учун унинг от кучи ва ишлаб чиқарилган санасидан келиб чиқиб ундириладиган бир неча миллион сўмлик тўлов бекор қилинади. Шунингдек, “гендоверенность”да юрганлар ҳам кам пул тўлаб, машинасини ўз номига ўтказиши мумкин бўлади.
Бундан ташқари, Молия вазирлиги ва Адлия вазирлиги томонидан автомобил олди-шартномасини нотариал расмийлаштириш учун белгиланган давлат божи миқдорларини пасайтириш бўйича қонун лойиҳаси ишлаб чиқилаётганлиги маълум қилинган.
Ушбу отнинг калласидек йиғимнинг ўта адолатсиз эканлиги ва бунинг ортидан амалиётда кўплаб можаролар юзага келиши ҳақида бир неча бор ёзгандик. Бир пайтлар жонажон монопол компаниямизни қўллаб-қувватлаш ҳамда иккиламчи бозордан машина олишни сунъий қийинлаштириш, шунингдек “таги тешик” Йўл фондини халқ чўнтагидан тўлдириш мақсадида жорий қилинган ушбу тўловни айланиб ўтиш учун аҳоли машиналарни ўз номига сотиб олмасдан, “генеральная доверенность” расмийлаштиради, бу эса катта таваккалчилик. Шунинг ортидан кўплаб мулкий низолар пайдо бўларди.
Фуқароларни мана шунақа зулукдек сўраётган асоссиз тўловлар тезроқ бекор бўлса, яхши бўларди.
👉 @xushnudbek 👈