ОТМларга қабул квоталари ва минимум балл муаммоси
Бир жиддийроқ масала чиқиб қолди.
Кўпчилик мурожаат қилиб, айрим йўналишларда аслида квота кўпроқ белгиланган бўлса ҳам, лекин ундан камроқ талаба қабул қилишганидан шикоят қилмоқда.
ТАТУ Самарқанд филиалини аниқ мисол сифатида олайлик.
«Компютер инжиниринги: АТ-Сервис» йўналиши рус гуруҳи учун 3 та грант, 11 та контракт учун квота ажратилган. Лекин расмда қарасак, 3 та грант, 1 та контрактга қабул қилишганини кўриш мумкин.
Бу биргина мисол, бу каби мисоллар юзлаб топилади.
Бунинг сабаби нима? Кўпчилик тушунишга қийналмоқда.
Гап шундаки шу йилгача, Давлат қабул комиссиясининг баённомаси асосида контракт учун максимал баллнинг 30%и, яъни 68 балл, грант учун эса 33,1%, яъни 75 балл қабул чизиғи этиб белгиланар эди. Яъни гарчи квота учун жой бўлсада, лекин шу белгиланган баллдан кам тўпласа талабаликка тавсия этилмас эди. Ўтган йили қўшимча контракт учун 68 балл белгилангани ҳам ўз-ўзидан эмасди.
Жорий йил ҳамда ҳам худди шундай бўлди: контрактда 68, грантда 75 баллни тагидан чизиқ тортишди.
Лекин бу ерда 2 та тушунмовчилик бор.
1. Жорий йилда максимал балл пасайди. Энди 30% лик чегара 56,7 баллда тўхтайди. Лекин нима учун жорий йилда ҳам 68 баллни тагидан чизишган, бу тушунарсиз.
2. Ундан ҳам муҳимроқ масала. Буни ўтган йили ҳам кўтариб чиққан эдим. «Абитуриент фалон баллдан паст олса, квота бўлса ҳам кира олмайди» деган қоида биронта раҳбарий норматив-ҳуқуқий ҳужжатларда, Вазирлар Маҳкамаси қарорларида, Низомларда, белгиланмаган. Бироқ ҳар йили Давлат комиссиясининг баённомаси билан шундай минимум чизиқ тасдиқланар экан.
Эътиборли жойи, Давлат комиссиясининг баённомалари “хизмат доирасида фойдаланиш учун” (махфий) мақомида бўлади ва ҳеч қаерда эълон қилинмайди.
Мана шундай махфий ҳужжатда келтирилган қоида қай даражада кучга эга? Ахир буни абитуриентларга етказиш керак эмасми? Ўйин қоидалари очиқ эълон қилинмаса ғирром бўлиб қолмайдими?
Боз устига айрим манбаларнинг айтишларича, Давлат қабул комиссиясининг жорий йилдаги 4 та баённомасида абитуриент олиши керак бўлган минимум чизиқ белгилаб берилмаган экан.
Бундан келиб чиқадики, ДТМнинг ушбу қарори жуда ҳам тушунарсиз бўлмоқда.
Умид қиламизки, мутасадди шахслар ушбу масалага тез орада эътибор қаратишади ва муаммони бартараф этишади.
Каналга уланиш: 👇
https://t.me/xushnudbek
