Халқ банки хориждаги ўзбекистонликлар учун кредитлар ажратади

Соғлом рақобат яхши-да. Айниқса бундан фақат ва фақат истеъмолчилар ютади. Рақобатнинг яна бир яхши томони халқнинг эҳтиёжи ва талабига яраша таклифлар пайдо бўла бошлайди, яъни Сизга аслида нима керак бўлса, шунга имконият яратиб беришади.

Бу гаплар Халқ банкининг «Expat Home» ҳамда «Expat Car» лойиҳаларини кўриб, яна бир бор эсимга тушиб кетди.

Ўзбекнинг асосий орзуларидан бири уй қуриш, тўй қилиш, машина олиш. Бу каби орзулар хорижга ишлашга кетаётган минглаб, балки миллионлаб юртдошларимизда ҳам бор. Улар хорижда ишлаб топган пулларини уйга юборишади, оила аъзолари эса ўша пулларни йиғишни бошлайди. Лекин “рўзғор – ғор” деганларидай у пуллар кўпинча ишлатилиб кетади, не-не умидлар билан ишлаб, қайтиб келган оила бошлиғи қарасаки, пуллар йўқ ёки чўғи жуда кам. Ана, кейин жанжаллар бошланади. Бунақа ҳолат ҳақида тез-тез эшитиб турамиз.

Халқ банки таклиф этаётган «Expat Home» тарифи орқали чет элда ишлаётган фуқароларимиз Ўзбекистондан бирламчи бозордан уй сотиб олиши мумкин экан. Бунда:
- хорижда туриб кредитни расмийлаштириш имконияти бор;
- юртимизда уй-жой қурилишига четдан инвестиция киритилади;
- миллий валютада ўн йил муддатга берилади;
- янги уй сотиб олиш учун йиллаб пул йиғмайди.

«Expat Car» тарифида эса чет элда ишлаётган юртдошларимиз UzAutoMotors машиналарини сотиб олиши мумкин бўлар экан. Бунда:
- чет элдан туриб кредитга машина олиши мумкин;
- Ўзбекистон автомобилсозлигига хориждан инвестиция киритилади;
- автокредит олиш учун ишончли вакили келса кифоя;
- янги автомобиль сотиб олиш учун пул йиғиш шарт эмас.

Рақобат яхши. Масалан, шунақа таклифлар бошқа банкларда ҳам пайдо бўлиб, бозорни тўлдиришса, шартлари янада осонлашиб, халқ учун янада қулай бўлади. Юқорида айтганимиздай рақобатдан фақат ва фақат истеъмолчилар ютади.