Uzcard омонатлардан 0,25% комиссия ундириши муҳокама қилинди

Яна Uzcard ва 0,25% ҳақида

Иқтисодчи Отабек Бакиров ўзининг Телеграм каналида Uzcard'нинг онлайн шакллантириладиган омонатлардан 0,25% комиссия ундириш борасидаги талаби бўйича ўз фикрларини билдириб ўтди. Холислик нуқтаи назаридан ушбу фикрларни ҳам эълон қилишимиз тўғри бўлади, менимча. Жумладан, у шундай дейди:

«Авваламбор, кеча ёзганимдек, Uzcard'нинг мазкур нарх ошириш ҳаракатига Антимонополия баҳо бериши зарур. Мамлакатда ишлаб турган тўлов карталарининг, карта орқали транзакцияларнинг 70-80%и Uzcard'га тегишли ва барча белгилари бўйича бу компания монопол мавқега эга. Монополистнинг ўзбошимчалик билан тўсатдан янги тариф белгилаши истеъмолчиларга ҳам, электрон тўлов тизими иштирокчилари фаолиятига ҳам зиён ва қўшимча харажат келтиради.

Иккинчидан, Uzcard фуқаролар лазейкадан фойдаланаётганини айтаётган экан, келинг, картадан онлайн омонатга эмас, онлайн омонат танидан ҳамёнга пул ўтказишда комиссия ўрнатилсин, банклар шу комиссияни Uzcard'га тўлаб берсин. Шунда ҳақиқий омонатчи билан лазейкадан фойдаланаётган "омонатчи" фарқи кўринади, қолади.

Чунки, учинчидан, назаримда, компаниянинг асл мақсади реклама ҳуқуқида тарқатилаётган матнларда ёзилганидек солиқ тўлаттириш ҳам эмас, ҳамён лазейкасини ишлатаётганларни жазолаш ҳам эмас. Мақсад фақат фойда, монопол имкон борида миллиард-миллиард қўшимча фойда ишлаб қолиш. Назаримда, Uzcard апрель ойида карантин даврида мамлакат бўйича қанча онлайн омонат шаклланганини кўриб, шу қарорга келган. Чўтга солган ва қанча бебилиска фойда ишлаши мумкинлигини хомчўтлаган. Банклар қаёққа ҳам борарди, ахир уларда ушбу ультиматумни қабул қилишдан ўзга чора йўқ. Марказий банк эса аралаша олмайди, чунки агар аралашса, Humo фойдасига иш қилинаяпти, вой-дод дея айюҳаннос солинади.

Тўртинчидан, нега талаб қилинаётган комиссия 0,25%. Русларда "по кочану" деган ибора бор. Улар шуни исташди, тамом. Ҳеч қандай калькуляция, ҳисоб-китобсиз, ўлчовсиз. Uzcard'нинг иштаҳаси ҳозир шундай», - дейди Отабек Бакиров.

👉 @xushnudbek 👈