Турколог олим Андрей Кубатин тўлиқ оқланди
Турколог олим Андрей Кубатин тўлиқ оқланди ва суд залидан озод этилди
26 сентябрь куни Тошкент вилояти судида ўзбекистонлик тарихчи олим, туркология мутахассиси Андрей Кубатиннинг иши кўриб чиқилди ва олим тўлиқ оқланиб, суд залидан озод этилди. Бу маълумотни Андрей Кубатиннинг рафиқаси Феруза Жуманиёзова фейсбукдаги саҳифасида маълум қилган, дея хабар бермоқда Кун.уз.
Тошкент давлат шарқшунослик институтининг катта ўқитувчиси бўлиб ишлаган ушбу ёш олим 2017 йили Жиноят кодексининг 157-моддасида («давлатга хоинлик қилиш») назарда тутилган жиноятларни содир этишда айбланиб ҳибсга олинганди.
Ўша йили Кубатинга нисбатан 11 йилга озодликдан маҳрум қилиш жазоси тайинланганди. Унга нисбатан эълон қилинган суд ҳукмида у чет эл фуқаросига (Туркия) маълум миқдордаги пул эвазига гўёки Ўзбекистон Давлат архиви ва Шарқшунослик институтида сақланган электрон китобларни, давлат сири акс этган ҳужжатларни бериб юборгани айтилганди.
Ўзбекистонлик ва хорижлик олимлар, ҳуқуқшунослар, Кубатиннинг яқинлари ва ҳамкасблари томонидан айтилган кўплаб эътирозлар, турли инстанцияларга йўлланган мурожаатлардан сўнг иш қайта кўриб чиқилди.
Натижада Андрей Кубатин айбсиз эканлиги эътироф этилди ва у ЖПКнинг 83-моддаси бўйича («Реабилитация учун асослар») суд залидан озод қилинди.
Кубатиннинг оқланиши яхши сигнал ва мазкур қарордан жуда хурсандман. Ҳақиқат қарор топиб, айбсиз олимнинг озодликка чиққани ва тўлиқ оқлангани қувончли воқеа. Кубатин ва унинг оиласини ушбу муваффақият билан табриклайман, илоҳим, энг ёмон кўрган куни шу бўлсин, барчаси ортда қолгани рост бўлсин.
Барча бегуноҳ қамалганларнинг мушкули осон бўлишига тилакдошман. Ҳеч кимнинг бошига тушмасин.
👉 @xushnudbek 👈