Танзила Нарбаева Россиядаги ўзбекистонликларга ёрдам сўради

Танзила Нарбаева Валентина Матвиенкога мактуб йўллаб, Россиядаги Ўзбекистон фуқароларига амалий ёрдам беришни сўради

Ижтимоий тармоқлар орқали Олий Мажлис Сенатига Россия Федерациясида ҳозирги мураккаб шароитда ишсиз, маблағсиз қолган фуқароларимиздан карантин тугагунча ва меҳнат бозори тўлиқ тиклангунига қадар патентни қайта расмийлаштириш, бекор қилиш, жисмоний шахслар даромадидан олинадиган солиқнинг тўлаш муддатини кечиктириш имкониятини кўриб чиқиш масаласида ёрдам сўраб мурожаатлар келиб тушмоқда.

Шуларни инобатга олиб, Сенат Раиси Танзила Нарбаева Россия Федерацияси Федерал Мажлиси Федерация Кенгаши Раиси Валентина Матвиенкога мактуб йўллади.

Мактубда Россия Федерациясида бўлиб турган Ўзбекистон фуқароларининг юқорида қайд этилган муаммоларига ҳам эътибор қаратилиб, уларни тезкорлик билан ҳал қилишда амалий ёрдам кўрсатиш сўралган.