ОТМлар рейтинги бекор қилинмаганлиги маълум қилинди
Таълим сифатини назорат қилиш давлат инспекцияси: ОТМлар рейтинги бекор қилинмаган, Адлия вазирлигининг барча важлари ҳам ҳақиқатга тўғри келмайди
Таълим сифатини назорат қилиш давлат инспекцияси Таълим муассасалари миллий рейтинги бўйича қўшма қарор ижродан қайтарилганлиги бўйича берилган маълумотга ўз муносабатини билдирди.
Муносабатда айтилишича, ҳақиқатдан ҳам, Адлия вазирлиги томонидан қўшма қарор рўйхатдан ўтказилмаганлиги сабабли уни ижродан қайтариш бўйича кўрсатмалар берилган. Лекин Адлия вазирлигининг Таълим сифатини назорат қилиш давлат инспекциясига йўллаган расмий хатида, рейтинг методикаси, кўрсаткичларига нисбатан ҳеч қандай эътирозлар келтирилмаган.
Бундан ташқари, бир қатор ОАВлар томонидан рейтинг натижалари бекор қилиниши бўйича берилган хабарлар асоссиз эканлиги таъкидлаб ўтилган.
Шунингдек, Адлия вазирлигининг расмий сайтидаги хабарда ҳам рейтинг натижалари бекор қилинганлиги тўғрисида ҳеч қандай маълумот берилмаган.
Инспекция Адлиянинг хабарида берилган айрим жиҳатларга аниқлик киритган.
Биринчидан, расмий рейтингни белгилаш бўйича тегишли норматив-ҳуқуқий базанинг йўқлиги ҳақидаги важга Инспекция унча қўшилмайди. Чунки Вазирлар Маҳкамасининг 29.12.2012й.даги 371-сонли қарори билан ОТМларнинг рейтингини ҳисоблаш мезонлари тасдиқланган бўлиб, Давлат инспекцияси томонидан ҳисобланган рейтингнинг аксарият индикаторлари айнан шу қарорда мавжуд.
Қарорга ўзгартириш киритишдан олдин, жорий йилда тажриба-синов тариқасида рейтинг ҳисоблашган.
Иккинчидан, барча ОТМлар ҳам рейтинг расман нашр этилгунича ўтказилган тадқиқот ва рейтинг натижалари ҳақида хабардор бўлмаганлиги ҳам нотўғри.
Чунки Давлат инспекцияси 2018 йил январь ойида барча ОТМларга рейтинг индикаторлари ҳақида таклифлар сўраб мурожаат қилган.
Апрел ойида методика тўғрисидаги маълумотлар расмий сайт ва Фейсбукда эълон қилинган.
Рейтинг натижаларининг эълон қилинишидан 3 ҳафта аввал, Давлат инспекцияси томонидан расмий хат билан ҳар бир ОТМга уларга тегишли дастлабки хулосалар танишиш учун расман тақдим этилган ва ОТМларга эътирозлар бўлса асослантирувчи ҳужжатларни тақдим этиш имконияти берилган.
Учинчидан, рейтингда фоиз кўрсатгичларига эмас, сон кўрсатгичларига қаратилганлиги важи ҳам ҳақиқатга тўғри келмайди, демоқда Инспекция.
Рейтингни аниқлашда ОТМлар фаолиятидаги ютуқларнинг ҳар бир профессор-ўқитувчига ёки талабага тўғри келадиган улуши (%да) ҳисобга олинган.
Тўртинчидан, тадқиқот бир ёқлама ва фақат олий ўқув юртларнинг илмий-тадқиқот фаолиятини таҳлил этишдан иборат бўлиб қолганлигига ҳам қўшилиб бўлмайди.
Рейтинг тизимида профессор-ўқитувчиларнинг илмий фаолиятига 34%, ўқув-услубий ишлар ва ўқитиш сифатига 30%, талабалар билими ва битирувчилар сифатига 28%, фаолиятда АКТни қўллаш ва моддий-техник таъминланганликка 8% ажратилган. Кўриниб турибдики, тадқиқот фақатгина илмий-тадқиқот натижаларига асосланмаган.
ОТМлар рейтингини белгилашда белгиланган мезонлар халқаро тажрибаларга асосланган, хусусан Times Higher Education, QS World University Rankings, BGU, U-Multi rank каби халқаро рейтинг агентликларининг амалдаги индикаторларига мос келадиган индикаторлар миллий рейтингда ҳам мавжуд.
Таълим муассасалари рейтингини аниқлаш Вазирлар Маҳкамасининг 2017 йил 18 июлдаги 515-сонли қарори билан Таълим сифатини назорат қилиш давлат инспекциясига вазифа қилиб топширилган.
Шунинг учун, жорий йилда эълон қилинган натижалар ўз кучида қолишини маълум қиламиз, дейди Инспекция.
Бундан ташқари, рейтинг олий таълим тизимидаги ҳолатни акс эттирувчи кўзгу эканлигини ва унинг натижалари информатив характерда бўлишини эслатиб ўтамиз. Рейтинг натижалари ОТМларга нисбатан чора кўрилишини назарда тутмайди, улар фақатгина ОТМларга келгусидаги фаолиятини белгилашга ёрдам бериши мумкин, - дейилади расмий муносабатда.
P.S.: Давлат органларининг матбуот орқали мунозарага киришишини кузатиш қандай ажойиб. Адлиядан жавоб кутамиз :)
Каналга уланиш: 👇
https://t.me/joinchat/AAAAAEe1KDC7Hm03UPVooQ
