Xushnudbek Xudoyberdiyev xatolari uchun uzr so'radi

Айтганча, шу кунларда орттирган яна битта жуда катта сабоғим шу бўлдики, инсонларнинг айбини очишга кўп ҳам интилмаслик керак экан. Чунки Аллоҳ Сизнинг айбингизни очиб қўйса, бундан ёмони йўқ экан.

Одам бир ишнинг ёмонлигини ўз танасида ҳис қилса, яхши дарс оларкан.

Масалан, бироз муддат олдин Қамариддин Шайхов бир қанча сайтларни ёмонлаб мақола чиқарди. Мақоласидаги фикрлари менга ёқмади ва Қалампир.уз сайтининг ўзини хатосини кўрсатиб, расмлари билан бирга кескин танқидий сўзлар билан пост ёзгандим. Ўша пайти буни жуда оддий қабул қилганман. "Ҳа, нима, фикри ёқмади, ўзи оппоқмас, халқ билиб қўйсин буни", деган фикр ўтган. Кибр бўлганмикин, бу фикрлар, товба қилдим.

Қайтар дунё, маълум муддат ўтгач, бу ўзимнинг бошимга тушди. Ўша пайти кўнглига қаттиқ олган экан чоғи, биринчи хато қадамимдаёқ ўзимга қайтарди. Масалан, менинг атрофимдагилар расмларим билан бирга чиқарган мақоласини қоралашди, “Сен ўлдига чиқарганинг йўқку, худди бу миш-мишни сен тўқиб чиқаргандай атайин провакация қилибди” дейишди. Яқинларим бўлгани учун шунақа ўйлашлари табиий.

Лекин Аллоҳ шоҳид, негадир буни жуда нормал қабул қилдим. Аслида шундай бўлиши керакдай худди. Чунки ҳаётда баъзан шундай воқеалар бўладики, нотўғри йўлга кетаётганингда, хулоса чиқариб олиш учун Аллоҳ синов юборади. Балки Сизга бу кулгули гапдир, лекин мен бунга қаттиқ ишонаман. Демак, келгусида билиб-билмай ўзгаларнинг шаънини очиқ-ойдин ерга уриш, бутун халққа "хатосини кўрсатиб қўйиб" мазах қилиш қанчалик ёмонлигини танамда ҳис қилишим учун шу воқеалар керак бўлган, деб хулоса қилдим.

Ёки Фейсбукда айрим қонунчиликка оид нотўғри фикр ёзганларга жуда кескин жавоб қайтаришни бошлаганимни эсладим. “Шуни ҳам билмайсизми, билмасангиз нега гапирасиз, қонунни вароқласангиз бўлмайдими?” деб ёзганларимни эслаб, уялиб кетдим. Баъзан ҳамма Сизни мақтайверса, олқишлайверса, ёзганлирингизни минглаб инсонлар ўқишини, Сиз билан керак бўлса ҳисоблашишларини ҳис қилсангиз, ўзингизни йўқотиб қўйишингиз рост. Ерга қайтиб тушиш учун ҳам кетма-кет иккита воқеа бўлди ва бундан хурсандман. Хайрлисини берсин, деб ният қилдим.

Шу чоққача кимнинг дилига озор етказган бўлсам, Ҳайит арафасида ҳаммадан узр сўрайман. Чин дилдан.

Ҳайитингиз муборак бўлсин!