Журналист Бобур Комилов вафот этди

​​Ўзбек журналистикасида оғир йўқотиш

Телеграмдаги журналистлар гуруҳида нохуш хабар янгради: халқаро тоифадаги машҳур журналист, БМТнинг Ўзбекистондаги ваколатхонаси матбуот котиби Бобур Комилов узоқ давом этган хасталикдан сўнг вафот этибди.

Бобур Комилов исмли журналист кўпчилик сингари менга ҳам "Давр" информацион кўрсатуви орқали севимли телебошловчига айланганди. Болалигимдаги хотираларнинг бир қисмида нутқи равон, ўз ишининг устаси бўлган, ақлли журналист сифатида Бобур аканинг сиймоси ҳам ўчмас бўлиб ўрин олган.

Кейинчалик Бобур ака билан кўп тадбирларда учрашдик, айрим жабҳаларда ҳамкорлик қилдик. Бобур ака жуда камтарин, ҳушчақчақ ва самимий инсон эди. Дунёқараши кенглиги учун улар билан суҳбатлашиш шунчаки одамга завқ бағишларди. Соатлаб турли лойиҳалар, ғоялар ҳақида гаплашиш мумкин эди.

Бобур ака илмга чанқоқ эди, шу сабабли интеллектуал лойиҳаларни, илмни доим қўллаб-қувватларди. Жуда яхши эслайман, бундан бир неча йиллар олдин Бобур ака билан ҳамкорликда БМТ ташкил этилган сана арафасида Тошкентдаги талабалар ўртасида "Заковат" турнири ташкил қилгандик. Ўшанда ҳам турнирни савияли ташкил этиш учун Бобур ака роса жонбозлик кўрсатгандилар.

Минг афсуски, шундай инсон бугун орамизда йўқ.

Лекин нима ҳам дердик, ўлим ҳақ, ҳар биримизнинг бошимизда бор савдо. Илоҳим, Бобур Комиловнинг жойлари жаннатдан бўлсин, яхши амаллари ўзи билан бирга бўлсин.

Инна лиллаҳи ва инна илайҳи рожиъун.

P.S.: Суратда 2011 йили Шарқшунослик институтида БМТ ташкил топган санага бағишлаб ўтказилган интеллектуал турнирдан лавҳа акс этган.