Ўқитувчиларнинг тиббий кўригидаги муаммолар

Ўқитувчиларнинг тиббий кўриги ҳақида

Адлия вазирлигининг "Ҳуқуқий ахборот" каналида бир неча бор ўқитувчиларнинг тиббий кўрикдан ўтиш чоғида чиқимдор бўлмаслиги ҳақида маълумот берилди.

Адлия вазирлиги айтадики, тиббий кўрикдан ўтиш муносабати билан ходимдан пул ундирилиши мумкин эмас, шунингдек тиббий кўрикларни ўтказиш вақтида ходимнинг иш жойи (лавозими) ва ўртача ойлик иш ҳақи сақланади.

Ҳа, тўғри, амалдаги меҳнат қонунчилиги бўйича шунақа. Лекин амалдачи? Нима учун амалда ўқитувчилар ёки иш берувчи ўз ҳисобидан мажбурий тиббий кўрикдан ўтказиши керак бўлган бошқа ходимлардан ҳалигача тиббий кўрик учун пул олинади?

Жавоби оддий: чунки молия бўлимлари бюджет ташкилотларининг сметасини тасдиқлаётганда тиббий кўрик учун пул ажратмайди! Бюджетдан пул ажратилмагандан кейин мактаб директорлари нима қилсин, ёнидан тўласинми шунча пулни?

Адлия вазирлиги ҳақиқатдан шу масалага киришиб, аҳолининг ҳуқуқий онгини оширишни мақсад қилган экан, унда охиригача олиб бориши керак.

Амалда қонунлар нима учун бажарилмаётганининг сабабларини аниқлаб, шунга қарши курашган янада фойдалироқ бўларди. Шунчаки савол-жавоблар билан бирор натижага эришиш қийин. Ўқитувчиларнинг ҳуқуқий онги ўта юксалиб, "мен ўз ёнимдан пул тўламайман" деган билан муаммо ечилмайди. Директор ҳам билганингни қил, дейди. Натижада тиббий кўриклар ўтказилмайди холос. Шуми ечим?

Бу ерда иккита саволга жавоб топиш керак:
1) Нима учун молия бўлимлари бюджет ташкилотлари сметасига мажбурий тиббий кўриклар учун пул ажратмайди?

2) Агар пул ажратилса, унда нима учун ҳалигача кўп жойларда ходимларнинг ўз пулига тиббий кўрикдан ўтказишади? Бюджет пулларини мақсадли сарфланмаётганлиги юзасидан кимдир жавоб бериши керакку ахир.

Каналга уланиш: 👇
https://t.me/xushnudbek