Машиналарни дезинфекция қилишнинг фойдаси ва харажатлари

Нимага ёки кимга фойда?

Ҳар куни Тошкент шаҳрига кириш учун постдан ўтаман. Тошкентга кираверишда йўлнинг бир томонига машиналарни дезинфекцияловчи ускуна ўрнатилган. Бу бўйича анчадан буён менда саволлар йиғилиб қолган.

а) нега фақат Тошкентга кираётган машиналар дезинфекция қилинмоқда, аммо Тошкентдан чиқишда қилинмаяпти? Ваҳоланки Тошкент атрофидаги туманларга қараганда пойтахтнинг ўзида аҳоли орасида коронавирусга чалинганлар, ундан вафот этганлар сони ааанча кўп. Шу сабабли мантиқан ўйлаганда аслида Тошкентдан вирус ташувчилар кўпроқ четга чиқиши мумкин.

b) нега дезинфекция сепувчи ускуна гоҳ ишлаётган, гоҳ ишламаётган бўлади? Бу шунчаки номига, кўзбўямачилик учун қилинаётганидан дарак эмасми?

с) ва энг асосий савол: бу ишнинг фойдаси борми ўзи? Машинанинг устига дезинфекция воситасини сепиш вирус тарқалмаслигини қандай қилиб тўхтатади? Ахир вируснинг асосий ташувчиси машина ичидаги инсонларку!

Яъни гап фақат Тошкент атрофидаги постларда эмас, бутун Ўзбекистон бўйлаб ўрнатилган мана шундай дезинфекция қурилмалари ва кўчаларга бетиним сепилаётган воситалар ҳақида гап кетяпти.

Жаҳон соғлиқни сақлаш ташкилоти ва хориждаги кўплаб илмий тадқиқот марказлари кўчаларни, машиналарни, ва ҳаттоки одамларни ташқи томондан дезинфекция қилиш, турли дезинфекция йўлакларини ўрнатиш вирусга қарши ҳеч бир самара бермаслиги ҳақида кўп бора илмий асосланган хулосаларини беришди.

Унда нима учун бизда бу ҳалигача давом этмоқда? Кимнинг хулосаси билан?

Агарда бунақа дезинфекциядан фойда бўлса, унда бирор илмий асосни жамоатчиликка эълон қилишсин, кўрайлик, билайлик.

Нотўғрилиги бир нечта асослар билан исботланган ишларнинг давом этаверишига одатда 2та сабаб бўлади:

1) ёки шунга топшириқ бераётганларнинг бунинг нотўғри эканлигини тушунишга билими, салоҳияти етмайди;

2) ёки нотўғрилигини билиб турса ҳам, турли манфаатлар туфайли давом эттираверади.

Энди бошқа бир фактга эътиборингизни қаратмоқчимиз.

Наманган вилояти Санитария-эпидемиология осойишталик маркази мансабдор шахслари «F.B», «A.T» ва «H.S» МЧЖлар билан тузилган шартномага мувофиқ, 275,9 млн сўм бўлган «гипохлорид калций» дезинфекцияловчи воситаларни 524,8 млн сўмга, яъни ўртача бозор нархидан 248,9 млн сўмга қиммат нархларда сотиб олишиб, жуда кўп миқдордаги бюджет маблағларини талон-торож қилганликлари аниқланибди.

Аҳа! Калаванинг учи шу ерда эмасмикин? Демак, илмий асосланмаган, лекин миллардлаб маблағ талаб этиладиган, кўп ҳолларда хўжакўрсинга қилинаётган айрим ишлар ортидан кимлардир юз миллионлаб фойда олаётган бўлиши мумкинми?

Ҳали биттагина вилоятда аниқланган биттагина ҳолат. Шу биргина ҳолатда вилоятдаги мансабдорлар 250 млн сўм фойда қилмоқчи бўлибди. Энди бутун республикани кўз олдингизга келтираверинг.

Ва энг алам қиладигани, бу талон-торожликларнинг барчаси эртага халқнинг, яъни Сизу бизнинг чўнтагимиздан қопланади. Буниси ёмон.

👉 @xushnudbek 👈