Коронавирус ҳақида муносабат ва тавсиялар

Коронавирус ҳақида

Кўпчилик коронавирус ҳақида сўрашмоқда. Бу бўйича менинг позициям қуйидагича:

Биринчидан, аввало бу вирус ҳазил ёки ўйин эмаслигини, жиддийроқ муносабатда бўлишимизни тўғри тушунишимиз керак;

Иккинчидан, Соғлиқни сақлаш вазирлиги «Ўзбекистонда коронавирус расман АНИҚЛАНМАДИ» деб баёнот беряпти. Бу дегани:

а) Ўзбекистонда ушбу ҳолат бўйича касалланганлар расман шифохоналарга мурожаат қилмаган;
b) турли симптомлар билан мурожаат қилганлар қонида коронавирус аниқланмаган;
c) коронавирус туфайли ҳеч ким вафот этмаган.

Бу расмий маълумот ва қўлимизда бошқа етарли далил йўқлиги учун шунга ишонишга мажбурмиз.

Учинчидан, аммо “аниқланмади” сўзи билан “МАВЖУД ЭМАС” сўзларининг фарқи катта. Яъни коронавирус расман аниқланмагани, бу Ўзбекистонда ушбу вирус йўқлигини англатмайди. Балки бордир, балки қайсидир юртдошимиз ўзи билан коронавирусни олиб юргандиру, лекин ҳали ўзи ҳам билмас, балки қайсидир турист шунақа вирусга чалингандир. Бунисини фақат Худо билади. Ундан бошқа ҳеч ким Ўзбекистонда коронавирус йўқлигига кафолат бера олмайди.

Ўзбекистонда коронавирус йўқ, деб баралла айтиш учун, аввал 34 млн аҳолини ва минглаб туристларни ёппасига тиббий текширувдан ўтказиш керак. Аммо бунинг иложи йўқ.

Тўртинчидан, энди хулоса қиламиз: коронавирус Ўзбекистонда аниқландими ёки аниқланмадими, Ҳукумат рост гапиряптими ёки алдаб, яширяптими, буниси оддий аҳоли учун унчалик катта аҳамиятга эга эмас.

Худдики, “коронавирус аниқланди” деган хабардан кейингина қўлни совунлаб ювишни бошлаш керагу, бунақа хабар чиқмаса, бемалол қўлни ювмай юраверса бўладими? Сиз учун бунинг фарқи бўлмаслиги керак.

Сиз бугундан ўзингиз ва оила аъзоларингизнинг эҳтиётини қилишни бошлашингиз керак. Бугундан! Эртадан эмас, 2 кундан кейин эмас. Айнан бугундан!

❗️Бешинчидан, эҳтиётни қилиш нима дегани? Бунинг учун Сиз:

a) қўлингизни тез-тез совунлаб ювиб юринг;
b) одамлар билан имкон борича қўл бериб сўрашманг;
c) қўлингиз билан кўзингиз ва юзингизни ишқаламанг;
d) ўта зарурият бўлмаса, кўпчилик йиғиладиган тадбирларда иштирок этманг;
e) жамоат жойларида ниқоб тақишга ҳаракат қилинг;
f) имкон қадар кўпчилик ушлайдиган предметларни ушлаганингизда қўлингизни антисептик воситалар орқали дезинфекция қилинг;
g) мабодо грипп ёки шамоллашга ўхшаш аломатларни сезсангиз, уйдан чиқманг, тезда уйингизга шифокор чақиринг.

Олтинчидан, коронавирус аллақачон тарқалиш тезлиги жиҳатдан пандемия дея расман тан олинди. Боз устига биз Хитойдан кўп ҳам узоқда эмасмиз. Шу сабабли мазкур вируснинг Ўзбекистонга кириб келиш эҳтимоли 99%. Шу сабабли Ҳукумат кескин чораларни кўришга ўтиши керак. Бу чоралар чегараларни ёпиш бўладими, таълим муассасаларига муддатдан аввал таътил бериш бўладими, фарқи йўқ. Қўрқмасдан кескин чораларга ўтиш керак. Бир нафар инсон ҳаёти ҳам бунақа қатъий қарорлар қабул қилишга арзийди.

Ва энг асосийси, коронавирус аниқланган бўлса, буни яшириш керак эмас. Ўша заҳоти расман айтиш шарт. Аҳоли ўртасидаги ваҳимадан эса хавотирланиш керак эмас, аксинча ушбу қўрқув аҳолини янада сергакроқ бўлишга, ўзини эҳтиёт қилишга ундайди. Бу фақат ва фақат фойда.

Еттинчидан, ваҳима қилманг, саросимага тушманг. Бу ўлат ёки вабо эмас, ёхуд бедаво дард ҳам эмас. Турли ваҳималарни тарқатишга кетган вақтингиздан кўра, ўз хавфсизлигингизни таъминлаш ҳақида кўпроқ қайғуринг. Ақл билан иш кўрилса, беталафот ўтиб оламиз, насиб.

Саккизинчидан, ва энг асосийси – барчамизни Аллоҳнинг ўзи асрасин.

Саломат бўлинг.

👉 @xushnudbek 👈