Konstitutsiyaga o‘zgartirish kiritish loyihasi nega yashirilmoqda

Кўп эмас, озгина уялинглар

Олий Мажлис Қонунчилик палатаси депутати Шуҳрат Полвонов Конституцияга киритилаётган ўзгаришлар ҳақида муносабат билдирибди. Унда айтилишича, бу жараён жамоатчиликдан сир тутилмаган экан.

Жумладан, 24 июлдаги Президент фармонида "Олий суд томонидан умумюрисдикция судлари ташкил этишга оид қонун лойиҳаси ишлаб чиқилгани маълумот учун қабул қилинсин" деган жумла билан жамоатчилик хабардор қилинган эмиш. Фармонда «Конституция» деган сўз бир марта ҳам ишлатилмаган бўлса-да, жамоатчилик ўзи тушуниб олиши керак бўлган экан. Фуқаролар қонун лойиҳасининг тўлиқ матнини балки тушида кўриб чиқиши керак бўлгандир?

Ваҳоланки, Олий суд томонидан суд тизимини институционал ўзгартиришга оид қонун лойиҳалари фақат ноябрь ойига келибгина махсус портал орқали жамоатчиликка эълон қилинди. Шунда ҳам Конституцияга ўзгариш киритиш ҳақида қонун лойиҳаси бу рўйхатда йўқ.

Гарчи депутатимиз ўз муносабатида одил судлов масаласи кенг муҳокама қилингани ҳақида бир нечта рақамлар (давра суҳбатлари, учрашувлар, ишчи гуруҳлар ва ҳ.к.) келтирган бўлса-да, лекин асосий савол барибир очиқ қолаверади:

❓Нима учун Конституцияга ўзгариш киритиш ҳақидаги қонун лойиҳаси нима учун ҳалигача, ҳа, яна қайтараман, ҲАЛИГАЧА жамоатчиликка эълон қилинмади?

Ёки эълон қилинган бўлса, қайси очиқ манбадалигини айтинглар, бўлди, ортиқча гапга ҳожат йўқ. «Мана, фалон сайтда, фалон газетада ёки қонун лойиҳалари учун очилган махсус порталда фалон пайти қонун лойиҳасини эълон қилганмиз, кўрмаган бўлсангиз бизни айбимиз эмас» деб шартта аниқ далиллари билан кўрсатсангиз, ҳеч бир шубҳага асос қолмайди, эътирозлар ҳам ўз-ўзидан тўхтайди.

Йўқса, бирорта жойда Конституция сўзи ишлатилмаган ва Бош Қомусга ўзгариш киритилаётгани ҳақида лом-мим дейилмаган хабарларни кўрсатиб (1, 2, 3, 4, 5), «журналист ёки блогер бирон бир материални тайёрлашдан аввал уни яхшилаб ўрганиши керак эмасми?» деб савол қўйманглар. Бунақа савол беришга озгина уялинглар. Кўп эмас, озгина уялинглар, етади шу.

Хуллас, Конституцияга киритиладиган ўзгаришларни ўзида акс эттирган қонун лойиҳаси қачон жамоатчиликка очиқ эълон қилинади? Эълон қиласизларми ўзи? Ёки журналист ва блогерларни тушунмаганликда айблаб мақолалар чиқариб, шу билан масалани ёпиб кетмоқчимисизлар?

👉 @xushnudbek 👈