ЖИДУда ҳужжат қабул қилиш муддати бўйича эътирозлар
Жаҳон иқтисодиёти ва дипломатия университетининг расмий сайтида абитуриентлардан ҳужжатлар 15 июндан 5 июлгача қабул қилинади, деган хабар чиқибди.
Бу дегани эртага ЖИДУга ҳужжат топширишнинг охирги куни экан.
Товба, нималар бўляпти ўзи-а?
Қанақа қилиб ҳужжатлар 5 июлгача қабул қилиниши мумкин, ахир Вазирлар Маҳкамасининг бугунги кунда кучда бўлиб турган 393-сонли қарорида ҳужжатлар 15 июндан 15 июлгача қабул қилинади, дея кўрсатилган бўлса?
Ёки ЖИДУга Вазирлар Маҳкамасининг бу қарори тааллуқли эмасми? Унда тегишли ўзгариш киритишсин, марҳамат. Ўзгариш киритилган бўлса, унда эълон қилишсин. Ахир норматив-ҳуқуқий ҳужжатлар расман эълон қилингандан кейин кучга киришини ҳамма биладику (сал бўрттирдим).
Тушуниб турибман, университет раҳбариятининг айтадиган гапи аниқ: 2018 йил 21 июндаги Президент қарорини асос қилиб келтиришади. Яъни "бизда янгича тартиб жорий қилинган, тестдан олдин оғзаки имтиҳон олинади, шунинг учун қабулни вақтлироқ тугатамиз", дейишмоқчидир. Лекин биринчидан, ушбу Президент қарори ҳозирги ҳолатга асос бўла олмайди. Чунки Президент қарорининг эълон қилинган матнида "ҳужжатлар 5 июлгача қабул қилинсин", дейилмаган (агар эълон қилинмаган бирорта иловасида бўлмаса). Иккинчидан, тестдан олдинги оғзаки суҳбат тартибининг ўзи йўқ. У қанақа бўлади, ким олади суҳбатни, қайси асосга кўра ўтади ёки ўтмайди, ҳаммаси мавҳум.
Қизиқ-да, ўзи ЖИДУда қабул бутун республикадан кеч бошланди. Ҳаммаёқда 16 июндан қабул бошланган бўлса, ЖИДУнинг квоталари 21 июнга келибгина тасдиқланди. Унгача хоҳлашса ҳам бирорта ҳужжат олишолмасди. Тиллар кесимида квотани бўлишга ҳам 1-2 кун вақт кетган, десак, ЖИДУ камида ҳамма ОТМдан 1 ҳафта кеч қабулни бошлаган.
Энди эса ҳаммадан 10 кун олдин қабулни тугатишмоқчи. Ия, бу нимаси? Бу янги схемами? Қанча кам одам топширса, шунча яхши деган принципми бу? Қани шаффофлик? Қани очиқлик? Қани ҚОНУНИЙЛИК? 5 июлда қабулни тугатишга бирорта қонуний асоси борми Университетнинг? Бўлса, билиб қўйсак ёмон бўлмасди. Эшигидан келган абитуриентни нима деб қайтаришади, қандайдир расмий изоҳ беришлари керакку ахир.
Бундан ташқари ДТМ сайтига ЖИДУ уланмаган шекилли, бугунги кунгача нечта ҳужжат келиб тушгани ҳақида барча ОТМларнинг маълумоти бор, лекин айнан ЖИДУники йўқ. Фақат университет сайтида кўриниб турибди холос. Нега ДТМ сайтида ушбу университет маълумотлари берилмаётгани ҳозирча номаълум.
Ҳа, айтганча бизга яна бир нарса номаълум. Нима учун ҳалигача 21 июнда қабул қилинган ЖИДУ фаолиятига оид Президент қарори Lex.uz сайтига жойланмаган? Бунинг сабабини ҳам ҳозирча билмаймиз.
Хуллас, саволлар кўп, ҳозирча жавоби йўқ. "Ташқи ишлар тизимида сифатли кадрлар тайёрламоқчимиз" деган шиор жуда ҳам эзгу ва биз эзгу ишлар ташкилотчиларини тўлиқ қўллаб-қувватлаймиз. Аммо бу ишлар қонун доирасида, шаффоф ва шошмашошарликсиз амалга оширилса, қандай яхши бўларди-а... Шунда халқнинг - абитуриентларнинг норозилигини олди олинармиди. Албатта буларнинг барчаси ИМҲО.
Имкони бўлиши билан бу мавзуга ҳали яна алоҳида қайтамиз.
Каналга уланиш: 👇
https://t.me/joinchat/AAAAAEe1KDC7Hm03UPVooQ