Интернет тезлигининг 10 баравар ошиши қандай бўлади

Интернет тезлигининг 10 баравар ошиши: бу қандай бўлади?

Турон24 нашри Ахборот технологиялари ва коммуникацияларини ривожлантириш вазирлиги билан боғланиб, ушбу масалага ойдинлик киритди.

Айтишларича, тезликнинг оширилиши барча интернет фойдаланувчиларида тезлик кескин ўн баробар ошиб қолишини англатмайди.

Гап шундаки, хусусий провайдерлар "Ўзбектелеком"дан ажратилган каналлар орқали абонентларга интернет тарқатади. Каналлар камлиги боис айрим ҳолатларда фойдаланувчиларга етиб борадиган интернет тезлиги тушиб кетган, натижада фойдаланувчиларга тариф ва пакетларда кўрсатилган тезлик таъминланмаган. Мисол учун аслида тарифда 3 мб/с тезлик кўрсатилган бўлса ҳам, лекин амалда 1-2 мб/с тезлик берилган.

Энди каналлар сони кўпайтирилади, бунинг натижасида трафик кўпайган соатларда тезликнинг тушиб кетиши каби ҳолатларнинг олди олинади ёки сезиларли камаяди.

Бир сўз билан айтганда, "Ўзбектелеком" провайдерларга кўрсатиладиган хизмат сифатини оширади, провайдерлар эса, ўз навбатида, абонентларга кўрсатиладиган хизмат сифатини ошириш имкониятига эга бўлади. Хизмат сифатини қай даражада яхшилаш, тезликни қанчалик ошириш ҳар бир провайдернинг ўз ихтиёрида бўлади.

Интернет нархида қандай ўзгаришлар бўлади?

Аниқланишича, "Ўзбектелеком" кутилаётган ўзгаришларни инобатга олган ҳолда йил давомида провайдерлар учун белгиланган нархларни босқичма-босқич тушириб борган. Абонентлар учун нархларнинг туширилиши ёки ошиши провайдерларнинг ўзига боғлиқ бўлиб, бозор шароитидан келиб чиқади. Таъкидланишича, нима бўлганда ҳам нархнинг кескин ошиши кутилмаяпти.

* * *

Хулласи калом, ҳозирги 1 мб/с тезликдаги интернетимиз 1 декабрдан 10 мб/с бўлади деб, кутманг.

Каналга уланиш: 👇
https://t.me/joinchat/AAAAAEe1KDC7Hm03UPVooQ