Грузия парламенти устидан жамоатчилик назорати тажрибаси

​​14 июнь куни Акмал Саидов раҳбарлигидаги Инсон ҳуқуқлари миллий маркази ташкил қилган давра суҳбатида иштирок этдим.

Унда турли давлат ва нодавлат ташкилотлари вакиллари билан биргаликда хорижлик экспертлар ҳам қатнашди ҳамда маъруза қилди.

Менга энг ёққани Грузиядаги “Transparency International” (“Халқаро шаффофлик”) ташкилоти эксперти Лика Саджаянинг тақдимоти бўлди.

У Грузия парламентининг шаффофлигида жамоатчилик назоратининг ўрни ҳақида сўзлаб берди.

Саджая Парламент аъзолари билан боғлиқ бир нечта статистикаларни келтириб ўтди.
Масалан, Грузияда кенг жамоатчилик депутатларнинг салкам ҳар бир қадамини назорат қилар экан. Парламент йиғилишлари батафсил ёритилади, тўлиқ видеотасвирлари халққа намойиш этилади.

Жамоатчилик томонидан депутатларнинг қонунчилик муҳокамасидаги иштироки бўйича махсус рейтинг тузиларкан. Қайси депутат нечта таклиф берди, ундан нечтаси ўтди - аниқ рақамларда акс этади. Қайси депутат қайси қонунларни ишлаб чиқишда бевосита иштирок этди, қай даражада? Ҳаттоки мутлақо “соқов” ва бирорта муҳокамада қатнашмаган, биттаям жўяли таклиф айтмаган депутатларнинг “қора рўйхати” тузиларкан. Лика ўз тақдимотида ўша депутатларнинг рўйхатини ҳам кўрсатди - 20 га яқин депутатларнинг исм-шарифи ўрин олган экан.

Бундан ташқари депутатларнинг тадбиркорлик фаолиятига оид алоқалари ҳам қатъий жамоатчилик назоратида бўларкан. Турли бизнесларга бевосита алоқадор депутатларнинг рўйхати тузиб чиқилган ва бир нечтасига тегишли чоралар ҳам кўрилган.

Шунингдек, парламент аъзоларининг коррупция билан боғлиқ ҳолатлари ва яна шу каби қизиқ фактларни, кўп ижобий тажрибаларни айтиб ўтди Саджая хоним.

У гапиряптию, хаёлимдан фақат битта фикр ўтмоқда: қачон бизда ҳам парламент устидан шунақа жамоатчилик назоратини олиб боришга ўтиларкин-а? Қизиқ, агар олиб борилса, депутатларнинг ҳеч бўлмаса ярми муносиб чиқармикин ўз лавозимига? Ким билсин тағин.

Лекин ҳурматга лойиқ ва ҳақиқий жонкуяр депутатлар ҳам бор, уларни унутмаслик керак. Яхшиям улар бор, қонун чиқарувчи ҳокимиятнинг обрўсини меъёрда ушлаб туришибди.

Каналга уланиш: 👇
https://t.me/joinchat/AAAAAEe1KDC7Hm03UPVooQ