Қашқадарёда АҚШ фуқароси Зокир Алиев ДХХ томонидан ушланди
Manba:Daryo — LIVE
Қашқадарёда милиция америкалик бизнесменни қўлга олди, дейишди. Милиция бу хабарларни ёлғон, деди. Тўғри, уни милиция эмас, ДХХ қўлга олган
17 июнь куни «Соф.уз» нашри асли ўзбекистонлик АҚШ фуқароси, тадбиркор Зокир Алиев Қашқадарёнинг Чироқчи туманидаги ота уйида Қарши шаҳридан келган милиция ходимлари томонидан ушланиб, олиб кетилгани ҳақида хабар берган. Қайд этишларича, унинг 90 кунлик визаси бўлган, Тошкентдан Чироқчигача ҳеч бир тўсиққа учрамай борган.
Бугун, 18 июнь куни, «Хабар.уз» Қашқадарё вилояти ички ишлар органлари билан боғланиб, вилоятда америкалик тадбиркор қўлга олингани ҳақидаги хабарлар рад этилаётганини хабар қилди. Рости, қашқадарёлик милиционерлар аввалига гап нима ҳақида эканини ҳам тушунмаган. Камида учта қўнғироқдан сўнг «бу ёлғон» деган гап айтилган.
Охир-оқибат ҳаммасига Давлат хавфсизлик хизматига асосланиб ЎзА аниқлик киритди: Зокир Алиев ҳақиқатан ҳам 16 июнь куни Чироқчида қўлга олинган, лекин милиция эмас, балки ДХХ томонидан қўлга олинган. Сабаби — Зокир Алиев «Ўзбекистон ислом ҳаракати»га алоқадорлиги учун қидирувда бўлган. Ёзишларича, у «ноқонуний фаолиятига иқрор экани тўғрисида кўрсатма берган».
Хабар беришларича, у 2000 йили «Ўзбекистон ислом ҳаракати»га содиқ бўлишга қасамёд қилган, Афғонистон ҳудудида жанговар тайёргарликдан ўтиб, Афғонистон ҳукумат кучлари ва АҚШ бошлиқ аксилтеррор коалиция кучларига қарши кураш олиб борган. 2014 йили эса АҚШ фуқаролигини олган.
Қайд этишларича, унга нисбатан жиноий иш ДХХ (аниқроғи, собиқ МХХ) томонидан 2005 йилиёқ очилган... Ўзбекистоннинг АҚШдаги элчихонасида Зокир Алиевга 90 кунлик виза бериш чоғида бу ҳақда билмаган бўлишларига ишониш қийин, албатта.
Айтмоқчи, Зокир Алиев бизнесмен кўринишида Ўзбекистонга қайтишга уринган гумонланувчиларнинг биринчи эмас. Аввалроқ Дубайда зирҳли автотранспорт ишлаб чиқариш билан шуғулланувчи Ўзбекистоннинг собиқ фуқароси ҳам ватанда корхона очиш истаги борлигини билдиргани айтилган, бироқ кейинроқ ОАВларда унинг баъзи жиноий ишларга алоқадорлиги ҳақида хабарлар чиққанди.
