Ўзбеккино телеканалларни қароқчиликда айбламоқда

«Ўзбеккино»: телеканаллар кўпчилик фильмларни соф қароқчилик билан намойиш этмоқда. Огоҳлантириш иш бермаса, судлашилади

2 ноябрь куни «Ўзбеккино» миллий агентлигида Бадиий кенгаш йиғилиши бўлиб ўтди.

Kun.uz мухбири хабар беришича, унда қуйидаги фикрлар айтилган:

«Ўзбеккино» миллий агентлиги директори ўринбосари Шуҳрат Ризаев:

«Давлат ва нодавлат телеканалларимизда муаллифлик ҳуқуқи тушунчаси шунчалик қадрсизки, улар киноижодкорлар томонидан ойлар, йиллар давомида тер тўкиб ишланган фильмларни истаганича, хоҳлаган жойидан қирқиб эфирга бераверади.

Бирорта фильмни кўрмаймизки, у тўлиқ эфирга берилган бўлса. Йўқ, албатта қаеригадир қайчи уришади, қаеринидир олиб ташлашади ёки титрларни кесишади.

Шунингдек, давлат ва нодавлат телеканалларида намойиш этилаётган фильмларнинг айримлари муайян шартнома асосида берилгандир, аммо кўпчилиги соф қароқчилик йўсинида фойдаланилмоқда».

Кинорежиссёр Зулфиқор Мусоқов:

«Бирор фильмим йўқки, у кесилмаган бўлса, ҳатто «Ватан»дан ҳам кўплаб эпизодларни кесиб ташлашди.

Яқинда очилган Ўзбекистон тарихи телеканалида «Берлин-Оққўрғон» фильмим намойишини кўриб рости, йиғладим. Биласизми, фильмнинг бор мазмунини очиб берадиган кадрлар йўқ.

Севишганларнинг биринчи бўсаси, қизил немис байроғи кўрсатилган, одам чавақланиб ётган кадрлар олиб ташланган.

Каналда ишлайдиган танишимнинг айтишича, бу тепадан тушган буйруқ экан. Буйруқнинг сабабини қаранг, немисларни ўша байроғи бизни Халқлар дўстлигидаги байроқдан кўра каттароқ экан.

Наҳотки, кино фильмларимизнинг тақдири шундай савиясиз, маданиятсиз, маълумотсизлар қўлига қолган бўлса.

Ходжаев билан ҳам гаплашдим (Алишер Ходжаев – МТРК раиси таҳ.). Унинг айтишича, қўлида 3 мингта одам ишлар экан ва уларнинг орасида аҳмоқлари ҳам бормиш. Лекин кечирасиз, эфирга у жавобгар-ку.

Мен «Ўзбеккино» миллий агентлигида раҳбарлик қилган ҳамма инсонларга бу масалани айтганман, лекин улар телевидение билан алоқалар ёмонлашишидан қўрқишади.

Мен юксак кабинетларга киролмайман, сизлар шу гапларимни давлат телеканаллари раҳбарларига етказинглар», дея агентлик раҳбари Фирдавс Абдухолиқовга мурожаат қилди таниқли кинорежиссёр.

Бадиий кенгаш аъзоси Мурод Муҳаммад Дўст:

«Билмайман, давлат телеканаллари нимани ва нимадан ҳимоя қилмоқчи ўзи?

Агар фильмларни қирқадиганлар жуда уятчан бўлишса, қонунда белгиланганидек, ёш тоифасига доир белги билан чиқаришсин (+18 таҳ.), лекин фильмларимизда жуда уятли гаплар ҳам йўқ-ку. Агар назоратчиларнинг бу уятчанлиги бўлса, қандай қилиб «Шум бола»ни, «Ўткан кунлар»ни одамларга кўрсатамиз?

Мен тушунмайман, бу «уятчанлар» ўзини худдики жамиятни ахлоқ дарвозаси олдига қўйилган қоровулдек тутишади.

Агар давлат телеканаллари кино кесишни шундай давом эттирса, «Ўзбеккино»нинг бадиий кенгаши нима керак?

Уларга ижодкор меҳнати, ижоди деган тушунчаларнинг эса тийинчалик қадри йўқ», дейди Мурод Муҳаммад Дўст.

Йиғилишда «Ўзбеккино» миллий агентлиги директори Фирдавс Абдухолиқов бадиий кенгашда билдирилган фикрлар инобатга олинишини, ҳамда Ўзбекистон Миллий телерадиокомпаниясига агентликнинг огоҳлантириш хати юборилиши, агар бу огоҳлантириш хати иш бермаса, телеканаллар билан қонуний асосда суд орқали муносабатлар ойдинлаштириб олинишини билдирди.

👉 @xushnudbek 👈