Ўзбекистонда каршеринг хизмати учун енгилликлар берилди

​​​​Каршеринг ҳақида

27 июлдаги Қонун асосида киритилган ўзгартиришга мувофиқ, эндиликда енгил автомобиллар ва мототранспорт воситаларини ижарага бериш бўйича хизмат кўрсатадиган юридик шахслар жисмоний шахслар билан ўттиз кунгача бўлган муддатга ижара шартномаларини оддий ёзма шаклда тузишлари мумкин, нотариал тасдиқлаш шарт эмас.

Бу ўз навбатида бизда каршеринг (автотранспорт ижараси) хизмати ривожланишига катта ёрдам беради. Туризм учун бу жуда керакли хизмат.

Хорижда бир марта бўлса ҳам жамоат транспортида юриб кўриш керак, албатта. Лектн агар оффлайн GPS картангиз ва ҳайдовчилик гувоҳномангиз бўлса, унда машина ижарага олиб миниш анча қулай ва қизиқ, менимча. Кўпчилик бўлса, арзонроққа ҳам тушади.

Хорижда ўзим бевосита гувоҳ бўлганимни гапирсам, Рим шаҳрида машина ижарага олишимиз учун атиги 10 дақиқа вақт кетганди.

Ортиқча ҳужжатлар ҳам сўрамаган - фақат паспорт, ҳайдовчилик гувоҳномаси ҳамда Visa card тақдим этганмиз, тамом. Тезда шартнома ва суғурта полиси чиқариб беришди, имзоладик, бўлди.

Энг қизиғи машина эвазига ҳеч қандай гаров олиб қолишмади, на ҳужжат, на пул.

Нархларга келсак, машина русумига қараб бир кунига 65 евродан 1800 еврогача экан (расмда батафсил 👇).

2 кишилик Smart машиналар энг арзони, Ferrari албатта энг қиммати. Қанча узоқ муддатга ижарага олсангиз, шунча арзон бўлади.

Бу нарх ўз ичига 100 км. масофани қамраб олади. Ундан кўпроқ юрмоқчи бўлсангиз, «Full» пакет оласиз, у сал қимматроқ.

Биз 1 кунга «B» категориядаги Fiat русумли машинани ижарага олдик, лекин негадир расмда кўрсатилгандек 70 евро эмас, чегирма билан 60 евро олишди.

Биздаги ижара хизматлари ҳали бу даражага чиқмади, албатта (ўзи энди очиляптику). Эшитишимча, қанчадир пулни «залог» сифатида ташлаб кетиш ҳам керак экан. Бу биздаги суғурта компанияларига ишонч йўқлигидан менимча. Нархлар ҳам бизнинг шароитда бироз қимматроқ дейишди.

Лекин умид қиламанки, тез орада каршеринг хизмати ҳам бизда ривожланган ғарб мамлакатлари каби тараққий этади. Фақат туристлар эмас, ўзимизникилар ҳам зарур пайти бемалол ижарага машина олиб минадиган бўлади.

Каналга уланиш: 👇
https://t.me/xushnudbek