Содиқ Сафоев Конституция ислоҳоти ва Президент ҳақида

“Шавкат Мирзиёев ҳокимиятга тиш-тирноғи билан ёпишиб олган сиёсатчи эмас” — Содиқ Сафоев

Бу ҳақда Олий Мажлис Сенати раисининг биринчи ўринбосари Содиқ Сафоев Kun.uz мухбири билан суҳбатда маълум қилди.

Жумладан, Содиқ Сафоев шундай деган:

«Мен аминманки, Конституциямизга ўзгартириш киритиш вақти келди. Бунга ҳеч ким шубҳа қилмайди.

Шу билан бирга, очиқчасига буни айтайлик, янги Конституция қабул қилинса, у албатта барча фуқаролар учун, шу жумладан бугунги президентимиз учун ҳам янги конституция бўйича сайловларда иштирок этишга имконият яратиб беради.

Президентимиз бу имконият ва ҳуқуқдан фойдаланадими, фойдаланмайдими, бу биринчи навбатда ушбу шахсга ҳавола. Бу шахсни кўрсатадиган сиёсий партияга ҳавола. Лекин бу ҳақ-ҳуқуқ у кишида бўлади. Бу – халқаро тажриба, янги конституциями, янги ҳуқуқий макон яратилди ва бу янгиланади».

Юқоридаги фикрлар Содиқ Сафоевнинг позицияси. Ҳозирча Конституцияга ўзгартириш ва қўшимчалар киритишга оид қонун лойиҳасини кўрмасдан туриб, бу бўйича бирор ҳуқуқий хулоса айтолмайман.

Шунингдек, интервью давомида Содиқ Сафоев яна қуйидаги фикрларни билдирган:

«Шахсан, менинг фикримни сўрасангиз, тажрибадан келиб чиқиб ва халқаро вазиятни таҳлил қилган инсон сифатида шуни айтишим керакки, бугун биз бир ниҳоятда таҳликали дунёда яшаяпмиз. Кундан кунга мураккаблашиб кетяпти. Шу жумладан бу мамлакатимиз учун ҳам салбий асоратларини кўрсатмасдан иложи йўқ. Лекин шунга қарамасдан биз ислоҳотларни давом эттиришимиз керак. Мен аминманки, бу ислоҳотларни бошлаган инсонда уни охиригача етказишга имконият бўлиши керак. Буни мен ким билан хоҳласангиз ва қаерда хоҳласангиз баҳс қилишим мумкин.

Биз ҳаммамиз сўнгги беш йилда шуни кўрдикки, давлат раҳбари, президентимиз Шавкат Миромонович Мирзиёев қандайдир ҳокимиятга тиш-тирноғи билан ёпишиб олган сиёсатчи эмас. Кўриб турибмиз, у киши эл-юрт ва ватан учун хизмат қилишга бел боғлаган, ўз умрини бағишлаган инсон. Кўриб турибмизки, халқимизнинг оғирини енгил қилиш, бирини икки қилиш, келажагини таъминлаш учун қанчалик ҳаракат қиляпти.

Бугунги таҳликали дунёда айнан дунё томонидан эътироф этилган лидер Ўзбекистонга йўлбошчи бўлиши бу халқимиз учун керак. Ислоҳотларимиз ва олиб борилаётган сиёсатларимизни давомийлиги ва изчиллигини таъминлаш биз учун муҳим масала».

Албатта, ушбу фикрларда жон бор. Ҳақиқатдан замон таҳликали ва бошланган ислоҳотлар мантиқий якунига етиши керак. Сўнгги йиллардаги ижобий ўзгаришлар Президент номи билан боғланишини нафақат миллионлаб халқимиз, балки халқаро ҳамжамият ҳам эътироф этмоқда.

Умид қиламанки, мураккаб танлов олдида халқимиз етти ўлчаб бир кесган ҳолда ўз хоҳиш-иродасини бевосита (референдум орқали) ёки билвосита билдиради. Ва қабул қилинган қарор (у қандай бўлишидан қатъи назар) Ватанимиз учун манфаатли бўлишини тилайман.

👉 @xushnudbek 👈