Сенат Солиқ қўмитасининг янги қарор лойиҳасини танқид қилди
Солиқ қўмитаси ва Марказий банкнинг қўшма қарори лойиҳаси қонуний меъёрлар асосида қайта ишлаб чиқилиши лозим
Олий Мажлис Сенати Бюджет ва иқтисодий ислоҳотлар масалалари қўмитаси раиси ўринбосари Одилжон Иминов шу кунларда ижтимоий тармоқларда кенг муҳокама қилинаётган Давлат солиқ қўмитаси томонидан ишлаб чиқилган қўшма қарор лойиҳасига ўз муносабатини билдирди.
http://senat.uz/uz/lists/view/1304
«Мазкур лойиҳанинг айрим жиҳатлари мунозарали.
Биламизки, Солиқ кодексининг 134-моддасида аниқ қилиб ёзилган, банк мижознинг банкдаги ҳисобварақлари ва омонатлари (депозитлари) мавжудлиги, уларнинг қолдиқлари, кўчирмалари, солиқ мажбуриятларини бажариши билан боғлиқ бошқа маълумотларни солиқ органининг сўровига биноан тақдим этиши керак.
Лекин муҳокамага қўйилган ҳужжатда бир ой давомида жисмоний шахсларнинг барча банк карталарига келиб тушган пул маблағлари айланмаси 30 млн. сўмдан (шу жумладан, чет эл валютаси миллий валюта эквивалентида бўлган тақдирда) ва транзакциялари сони 10тадан ошган операциялари тўғрисидаги ахборотларни банклар солиқ идораларига тақдим этиши белгиланмоқда.
Солиқ кодексининг 134-моддасида жисмоний шахсларнинг банк карталарига келиб тушган пул маблағларининг айланмаси тўғрисидаги маълумотлар ўз ифодасини топмаган.
Ўз-ўзидан кўриниб турибдики, муҳокамага қўйилган ҳужжатга Солиқ кодексида назарда тутилмаган меъёрлар киритилган.
Шу боис кенг муҳокамага сабаб бўлаётган ҳужжатни Солиқ кодексига асосан қайта кўриб чиқиш лозим», - дейди сенатор.
Аввалроқ Савдо-саноат палатаси ҳам ушбу лойиҳани жамоатчилик экспертизасидан ўтказиб, лойиҳада акс этган талаблар Солиқ кодексида кўрсатилмагани, яъни бу қоидалар ҳуқуқий асосга эга эмаслигини билдирган эди.
http://www.chamber.uz/uzk/news/6107
Шу боис, ССП қарор лойиҳасидаги 1-илованинг 3-банди 4-хатбошисини лойиҳадан чиқариб ташлаш лозимлигини таъкидлаган.
Маълумот учун, Солиқ қўмитасининг ўзи бу лойиҳага «яширин иқтисодиёт»га барҳам бериш учун дея изоҳ берган эди.
👉 @xushnudbek 👈
