Сарвқомат дилбарим фильмини кўриш тавсия этилади

​​«Сарвқомат дилбарим» - бу фильмни албатта кўринг!

Кимгадир бирор нарсани тавсия қилишдан олдин (бўлибам каналим орқали) албатта унинг яхшилигига ўзим ҳам ишонишим керак. Кўр-кўрона ниманидир мақташ яхшимас. Гарчи «Сарвқомат дилбарим» фильми ижодкорлари таниш бўлсада, лекин токи ўзим шу фильмга тушиб, ўз кўзим билан кўрмагунимгача ҳеч кимга тавсия қилмай турдим. Ҳозир эса бемалол айта оламан - бу фильмни албатта кўринг, вақтингизга ачинмайсиз.

«Сарвқомат дилбарим» ўзбек-қирғиз ижодкорлари ҳамкорлигида Чингиз Айтматовнинг 90 йиллигига бағишлаб суратга олинган. Айтматовнинг шу номли қиссасини 10 йиллар олдин ўқигандим, лекин ўша пайтдаги туйғуларимни кино орқали яна бир бор ҳис қилдим. Рости охирида залдагиларнинг кўзига ёш келди. Фильм ижодкорлари буюк адиб айтмоқчи бўлган ғояни томошабинга тўлиқ етказиб бера олган.

Актёрлар ижросига ҳам гап йўқ. Қирғиз актрисаси Мадина Талипбек "PROLogue" кинофестивалида «Энг яхши актриса» номинациясини бежизга олмаган. Адиз Ражабовни енгил-елпи фильмларда кўриб ўрганиб қолган эканмиз, лекин бу картинада роса «очилибди». Хулоса қилдимки, актёрларимиз ҳам мана шунақа савияли фильмларга роса чанқоқ экан, ўзларига қолса бачкана фильмларда чиқишмасди.

Ва ўзи "PROLogue" кинофестивалида Ўзбекистон номидан иштирок этган ягона тўлиқ метражли фильм ҳам айнан «Сарвқомат дилбарим» бўлди.

Хуллас, минг марта гапиргандан бир марта кўрган яхши! Ваҳима қилинган айрим фильмлардан минг чандон яхши. Фақат бу жамоада реклама учун сарфлайдиган миллиардлаб пул йўқ, ҳар қанча эркалатадиган каттакон ҳомийлар йўқ, лекин уларда энг асосийси - савияли фильм бор!

Тавсия қиламан.

Каналга уланиш: 👇
https://t.me/joinchat/AAAAAEe1KDC7Hm03UPVooQ