Қариндошлар ўртасидаги никоҳнинг аянчли оқибатлари
Фейсбукнинг аввалги йиллардаги постларни эслатиб туриши яхши. Мана бу 2016 йилдаги постим экан:
Бугун 1 июнь, “Халқаро болалар куни”.
Мазкур сана муносабати билан барча-барча болажонларни (18 ёшгача бўлган барчани) табриклайман. Максим Горький айтганидек, болалар - ҳаёт гуллари!
Шу ўринда, бир гап – қариндошлар ўртасида никоҳ қурмаслик ва бундай никоҳга доим қарши бўлиш керак экан. Мазкур гапларни болалар кунига нима алоқаси бор дерсиз? Ҳозир тушунтираман.
Яқинда Қувасой туманига ташриф буюрганимизда бизни карлар мактабига олиб боришди. Аслида бу ердаги болажонлар кар-соқовлар экан. Аммо соқовлик карликнинг оқибати бўлгани учун, мактабни кар-соқовлар мактаби эмас, карлар мактаби деб аташаркан. Бунинг устига “кар-соқовлар мактаби” жуда қўпол эшитилади.
Аммо мазкур мактаб болажонлари бутунлай соқов эмасканлар. Мактабнинг жонкуяр, фидоий ўқитувчилари уларга оз-моз гапиришни ўргатишган, айрим сўзларни қийналиб бўлса-да талаффуз қилишаркан. Масалан, исм-фамилияси, отасининг исми, туғилган жойи, манзили, “Ассалому алайкум”, “Раҳмат” каби сўзларни айта олишади. Бироқ ўқитувчиларнинг айтишича, улар шунчаки овоз чиқаришади, лекин нима дейишаётганини англашмас экан.
Хуллас, мазкур мактаб болажонлари китоб ўқишни севишларини ҳисобга олиб, уларга китоблар совға қилдик.
Мактаб директорининг бизга маълум қилишича, карлар мактабида таҳсил олаётган болажонларнинг 70-80%и айнан яқин қариндошлар ўртасида қурилган никоҳларнинг қурбони экан. Ва бу кейинчалик насл ҳам сураркан.
Илоҳим, ҳар кимнинг фарзанди соғ-саломат бўлсин.
Каналга уланиш: 👇
https://t.me/joinchat/AAAAAEe1KDC7Hm03UPVooQ
