Президентнинг аёллар рўмоли ҳақидаги фикрларига муносабат

Шоҳ ва мот!

Охирги кунлардаги энг кулминацион видеода бир нечта сигналлар бор:

1. Боксчимиз Мирзахалилов Миразизбек фарғоналик, унинг оналари рўмолда сўзга чиқди. Бу ҳам катта мажозий маънога эга;

2. Президентнинг “ижтимоий тармоқларда кўп масалалар кўтариляпти” деган гапи, унинг жамиятда бўлаётган воқеалардан хабардорлигига ишора бўлди. Яъни Президентга ижтимоий тармоқларнинг энг қайноқ муҳокамаларини етказиб турувчи жамоа жуда яхши ва тезкор ишламоқда;

3. Президентнинг мазкур 40 сониялик нутқи жамиятдаги иккиланишларга нуқта қўйди. “Қандай ярашади ўзбекона рўмоллар, қандай ярашади ўзбекона кийинишларимиз” деган гап келгусида аёлларнинг рўмол ўрашига қарши чиқадиганларнинг барчасига мораторий сифатида янгради;

4. Аслида барчаси қонунларда мустаҳкамланган, ҳеч ким аёлларнинг рўмолини ечтиришга ҳақли эмас. Аммо бизнинг жамиятда ижрочилар қоғоздаги қонунлардан кўра сиёсий иродага қараб иш тутиши барчамизга маълумку. Мана шундай жамиятда Президентнинг бугунги қисқа нутқи амалий жиҳатдан жуда катта қийматга эгалигини тасаввур қилиш қийин эмас. Энди кимнинг ҳам ҳадди сиғарди рўмолга тегишга?!

Хуллас, юқоридаги видеони кўриб, жуда хурсанд бўлдим. Ич-ичимдан қувондим. Негалигини яхши тушунтириб бера олмагандирман, лекин хурсандман.

👉 @xushnudbek 👈