Ўзбекистоннинг ЕОИИга аъзо бўлиши масаласи муҳокамаси
Xushnudbek.uzMatn2 daqiqa0tahrirlanganЎзбекистон Евроосиё иқтисодий иттифоқига кириши керакми?
Евроосиё иқтисодий иттифоқига аъзолик масаласи кўриб чиқилиши мумкинлиги илк бор жорий йилнинг июнь ойидаги Сенатнинг 20-ялпи мажлисида Шавкат Мирзиёев томонидан айтилган эди.
Ўша пайтда Кун.уз нашри иттифоққа аъзолик атрофидаги муҳокамалар ҳақида Нагоя (Япония) иқтисодиёт университети, бизнес ҳуқуқи факультети профессори Алишер Умирдиновнинг фикрларини эълон қилган эди.
Шу мавзу доирасида анчайин яхши, имкон қадар холисона ёритилган мақола бўлганди. Ўқиб чиқишни тавсия қиламан:
Муаллиф Евроосиё иқтисодий иттифоқининг ижобий томонларини ҳам санаган, яъни мутлоқ салбий ташкилот эмаслигини тушунтирган. Аммо мақоладан иттифоққа киришнинг салбий оқибатлари анчайин кучлироқ ва хавфлироқ эканлигини ҳам билиб олиш мумкин.
Масалан, Россиянинг сиёсий босими ва унинг сиёсий ўйинлари йўлида иқтисодий ричаглардан фойдаланишига шароит яратилишининг ўзи ҳар қандай ижобий аргументни парчалаб ташлайди. Шахсан мен иқтисодий асосларидан кўра, сиёсий манфаатларга йўғрилган ташкилотга аъзо бўлишни хоҳламайман.
Кеча бўлиб ўтган Олий Мажлисдаги учрашувда Россия Сенати раиси Валентина Матвиенконинг “Президентингиз қарор қабул қилиб бўлган, бизнинг бундан хабаримиз бор” дейишининг ўзи дипломатик нуқтаи назардан қараганда ўзга давлат учун, юмшоқ қилиб айтганда - ҳурматсизлик. Мана шунинг ўзи мустақил давлатга нисбатан сиёсий босим ўтказиш, дея баҳоланиши мумкин.
Ваҳоланки, Ўзбекистоннинг Евроосиё иқтисодий иттифоқига қўшилиши масаласи ҳали ҳал бўлмаган, ҳозирда ҳукуматлараро махсус ишчи гуруҳ ўрганмоқда, йил якунида тегишли хулосага келинади. Қолган гап-сўзлар эса жараённи ўз манфаати томонга ўзгартириш йўлида қилинаётган манипуляция бўлмоқда, менимча.
Ҳар не бўлганда ҳам якунда ҳукуматимиз томонидан Ўзбекистон ва халқ манфаати учун хайрли қарор қабул қилинади, деган умиддамиз.
👉 @xushnudbek 👈
