Магистратурага ҳужжат топширишдаги чекловлар бекор қилинди
Магистратуранинг турдош йўналишлари бўйича шарҳ
Апрель ойида жорий йилдан бошлаб магистратурага фақат турдош йўналишларни битирган бакалаврлар ҳужжат топшира олишига оид тақиқ бекор қилиниши режалаштирилаётгани ҳақида ёзган эдим.
2019 йил 17 июндаги Президент қарори билан ушбу ўзгариш расман тасдиқланди. Фақат алоҳида чеклов ўрнатиладиган айрим йўналишлар рўйхати тасдиқланиши кутилаётган эди.
Ниҳоят узоқ кутилган ўша тарихий рўйхат эълон қилинди.
Энди ўз-ўзидан саволлар кўпайиши табиий. Бу рўйхат нимани англатади? Бу рўйхатда йўқ йўналишлар билан энди нима бўлади? Фалончи йўналишдан пистончига топшира оламанми? Пистончидан фалончигачи?
Шу масалага ойдинлик киритамиз. Аслида барчаси жуда оддий ва содда.
Юқоридаги рўйхатда 6 та гуруҳ берилган. Биз уларни умумий қилиб қўйидагича гуруҳларга ажратимиз:
1) спорт;
2) мусиқа;
3) тасвирий санъат;
4) санъатшунослик;
5) техноген санъат;
6) соғлиқни сақлаш.
Мана шу юқоридаги 6 та гуруҳда турдош таълим йўналишлари учун қатъий чеклов бор, бундан чиқиш мумкин эмас.
Бундан ташқари яна 6 та алоҳида номдаги йўналишлар саналган, булар:
1) “Чақириққача ҳарбий таълим”;
2) “Хореография (турлари бўйича)”;
3) “Дирижёрлик (турлари бўйича)”;
4) “Режиссёрлик (турлари бўйича)”;
5) “Актёрлик санъати (турлари бўйича)”;
6) “Ветеринария”.
Ушбу 6 та йўналишга ҳам чеклов бор, улар фақат ўзларига мос йўналиш бўйича магистратурага ҳужжат топшира олади холос. Яъни “Дирижёрлик” фақат “Дирижёрлик”ка, “Ветеринария” фақат “Ветеринария”га ва ҳ.к.
Шу жойигача тушунарлими? Демак, хулоса қиламиз: юқорида фақат чеклов қўйиладиган йўналишлар номи саналган.
Ана энди асосий қисмига етиб келдик. Бу рўйхатда йўқ йўналишлар билан нима бўлади?
ЖАВОБ: юқорида номи тилга олинмаган таълим йўналишлари исталган магистратура мутахассисликлари бўйича танловда қатнашиш ҳуқуқига эга. Яъни ҳеч қанақа чеклов йўқ.
Математикани тугатган юриспруденцияга топшира олади.
Физикани тугатган журналистикага топшира олади.
Филологияни тугатган нефть-газга топшира олади.
Ирригацияни тугатган халқаро муносабатлар ва жаҳон сиёсатига топшира олади.
Хуллас, тушунтира олдим деб ўйлайман.
Яна бир жойи. Ҳов, тепадаги чекловлар рўйхати бор эдику. Ўша рўйхат фақат "кириш" учун чеклов. "Чиқиш" учун эса чеклов йўқ. Масалан, тиббиётни тугатган юриспруденцияга топшира олади, лекин юриспруденцияни тугатган тиббиётга топширолмайди. Ёки санъатни тугатган иқтисодга топшира олади, иқтисодни тугатган санъатга топшира олмайди. Ва ҳ.к.
Фақат яна кичкинагина чеклов бор. Агар қайсидир магистратура мутахассислиги учун мақсадли қабул ажратилган бўлса, ўша мақсадли қабулга фақат турдош йўналишни битирганлар топшира олади, бошқалар даъвогарлик қила олмайди. Аммо бу арзимаган чеклов.
Мана шунақа гаплар, ўртоқлар.
Менинг ўта шахсий фикримча – 2019 йилги барча қабул жараёнларининг энг катта ижобий янгилиги айнан мана шу бўлди. Бу айни ҳозирги шароитда тасаввур қилиш қийин бўлган даражадаги эркинлик ва имтиёз бўлди, деб бемалол айта оламан.
"Дакументни" қўлга олинг-да, магистратура қабули томон шошилинг!
Яхши янгиликлар кўпаяверсин...
👉 @xushnudbek 👈
