Карантин даврида тўй ва ошларни тўхтатиш керак

Ўлдирса ҳам - ош ўлдирсин

Кеча кундузи бир зарурият билан кўчага чиқдим (ўзи уйдан чиқмасдан масофавий ишлаяпман). Йўл-йўлакай бир тўйхонанинг ёнидан ўтдим. Ош бўлаётган экан.

Тўйхона олдида костюм-шим кийган, кўринишидан зиёли, олий маълумотли инсонларга ўхшайдиган 20-25 нафар эркаклар бир қатоооор бўлиб туриб олишган.

Энг даҳшати ошдан чиқиб келаётган сурув-сурув юзлаб инсонлар мана 25 киши билан бирма-бир сўрашиб, камига тўйнинг катта эгалари билан қучоқлашиб ўтиб кетишяпти. 200-300 инсон, тасаввур қиляпсизми!?

Ўлдирса ҳам - ош ўлдирсин, деган мақол ҳақиқатдан топиб айтилган экан лекин.

Ўзбекнинг туғилиши ҳам ош, ўлими ҳам ош эди, ана энди фожиаси ҳам ош бўлиб қолмаса гўрга эди...

Кўринишидан зиёли бўлган бу инсонлар ўзларининг орзу-ҳаваслари учун юзлаб инсонларнинг ўлиб кетишига ҳам рози. Уларга коронавирусинг нимаю, пандемиянг нима. Карантининг нимаю, изоляциянг нима. Бир тийинлик қизиқмас улар учун. Уларга дабдаба, обрў, ён атрофдагиларнинг гап-сўзи кўпроқ муҳим. “Одамлар нима дейди” деган қўрқувдан қутилиш учун ҳар нарсага, ҳаттоки юзлаб инсонларнинг ҳаётини хавф остига қўйишга ҳам тайёр!

Хўш, Сизчи, Сиз? Уларку майли, лекин Сиз нима учун ошга айтишса, лик этиб югуриб бораверасиз? Шунчалар бир чуқум ошга зормисиз? Ёки оч қоляпсизми? Ёки ошга бормаслик жиноятми? Ўз ҳаётингиз шунчалар арзонмики, уни бир чуқум ошга алмашсангиз?

Ўзбекчилик дейсизми? Ҳой, барака топгур, мана шу ўзбекчилик туфайли ошда ёнингизда ўтирган ёки Сиз худди урушдан қайтган отангизни кўргандай қаттиқ қучоқлашган инсон орқали коронавирус юқтириб олган бўлишингиз мумкин. Ўзингизку майли, лекин Сиз орқали бу вирус оила аъзоларингизу, норасида фарзандларингизга ҳам юқиши мумкин. Кейинчалик ўлим билан олишаётган ва азоб чекаётган фарзандларингизнинг кўзига қараб нима дейсиз: «Ўғлим, қизим, ўзбекчилик шунақа нарса, ошга бормасам бўлмас эди, Сизларнинг ҳаётингиздан ҳам менга ўзбекчилик муҳимроқ» дейсизми?

Калла жойидами ўзи?!

Йиғиштиринглар, бунақа ўзбекчиликни. Йиғиштиринглар, бунақа дабдабаю, ҳою-ҳавасни. Йиғиштиринглар, юзхотирчиликни.

Аввалоси бутун республикада барча тўйларни тўхтатиш керак. Зудлик билан! Ўзбек тўй қилмаса ўлиб қолмайди, аммо коронавирусдан ўлиб кетишимиз мумкин. Никоҳи белгиланган икки ёшни битта мулла чақириб, никоҳлатиб қўйса ҳам бўлади. Бу уларнинг бахтига бир грамм таъсир қилмайди. Аксинча, тўйдан иқтисод қилинган пулга ёш оила учун кўп ишлар қилиш мумкин. Ўғлини суннат қилишни ният қилган ота ҳеч қандай дабдабасиз шундоқ духтирга бориб, қилдириб келса ҳам бўлади.

Қизиқда, мактаблар ёпилди, университетлар ёпилди, масжидларда ҳам намоз ўқиш тавсия этилмаяпти, чегаралар ёпилди, лекин тўйга рухсат эмиш! Бу мантиқсизликку! Ҳамма бало шу тўйдаку!

Эсингизни йиғинг, ҳурматли юртдошлар. Ўзингизни ҳам, ўзгаларни ҳам эҳтиёт қилинг. Ваҳима қилинг демаяпман, шунчаки эҳтиёт бўлинг деяпман холос.

👉 @xushnudbek 👈