Электрон меҳнат дафтарчаси 2019 йил ўрталаридан ишга тушади
Электрон меҳнат дафтарчаси 2019 йилнинг ўрталаридан ишга тушади. Ҳали дастур синовдан ўтяпти экан
Президент Фармонига биноан, 2019 йилнинг 1 январидан бошлаб биринчи марта ишга жойлаштирилган ходимларга қоғоз шаклидаги меҳнат дафтарчалари берилиши тўхтатилиши керак эди. ОАВда “бу тизим қай даражада тайёр ўзи”, деган мақолалар чоп этилди.
Бандлик ва меҳнат муносабатлари вазирлиги бу масала бўйича расмий баёнот берди.
Баёнотдан англашиладики, ҳақиқатдан 1 январдан бошлаб оммавий равишда 1-марта ишга кирганларга электрон меҳнат дафтарчаларини беришнинг ҳозирча иложи йўқ.
«2019 йилнинг 1 январидан “электрон меҳнат дафтарчаси” амалиёти дастлаб синов тариқасида фақат Вазирлик тизимида ишга туширилди.
Бундан кўзланган асосий мақсад, “электрон меҳнат дафтарчаси”ни Республика бўйлаб кенг тадбиқ этишдан аввал синов лойиҳаси орқали тизим ишончлилигини текшириш, юзага келиши мумкин бўлган камчиликларни аниқлаб, уларни бартараф этиш ва тизимни янада такомиллаштиришдан иборатдир», - дейилади баёнотда.
Электрон меҳнат дафтарчаларини бериш ҳақидаги Президент Фармони 2017 йил 24 майда қабул қилинган эди. Орадан 1 йилу 7 ой ўтди. Тизимни шу пайтгача синаб кўрса бўлмасмиди?
Шунингдек, вазирлик баёнотида айтиладики, «электрон меҳнат дафтарчаси амалиётга тўлиқ жорий қилингунча, қоғозли меҳнат дафтарчаси ўз кучини йўқотмайди ва шу асосда фуқаролар ишга қабул қилинади. Бугунги кунда қоғоз шаклидаги меҳнат дафтарчалари берилишини тўхтатмаслик бўйича Вазирлик томонидан Аҳоли бандлигига кўмаклашиш марказлари ва бошқа тегишли ташкилотларга кўрсатма берилган».
Демак, 1 январдан эътиборан 1-марта ишга кирганларга электрон меҳнат дафтарчалари берилиши ҳақидаги гаплар ҳозирча амалга ошмай турибди. Тизим ҳақида ТВларда чиқишлар қилинди, ОАВларда мақолалар берилди, роса тарғибот қилинди, хуллас. Лекин амалиётда ҳозирча қоғоз кўринишидаги меҳнат дафтарчаларини бериш давом этар экан. Фақат вазирликнинг ўзини тизимидаги ташкилотларга ишга кирганларгагина электрон меҳнат дафтарчалари берилади холос. Тушунарли.
Вазирлик расмий баёнотида бу тизим қачондан ишга тушиши мумкинлиги ҳақида ҳам маълумот берган:
«Электрон меҳнат дафтарчаларини оммавий жорий этишни амалга ошириш 2019 йилнинг биринчи ярмида режалаштирилмоқда».
Ҳозирча бу тизимнинг ҳуқуқий асослари ҳам яратилмаган эди. Шу сабабли вазирлик ўз баёнотида «тегишли Қонун ҳужжатларига ўзгартириш ва қўшимчалар киритилаётганини» эслатиб ўтган (1 йилу 7 ой вақт бор эди).
Вазирлик баёнот охирида ПФ-5052-сонли Президент Фармонида «электрон меҳнат дафтарчасини 2019 йилнинг 1 январидан босқичма-босқич жорий этилиши белгиланганлиги» ҳақида эслатиб ўтган. Яъни “айнан 1 январдан ҳамма меҳнат дафтарчаларини электрон кўринишга ўтказишга мажбур эмас эдик, бу босқичма-босқич бўладиган иш” дейишмоқчи.
Ҳа, қисман улар ҳақ, ҳамманикини бирдан электронга ўтказиб бўлмайди. Лекин Президент Фармонида қуйидагича вазифа белгиланганди:
- 2019 йилнинг 1 январидан бошлаб биринчи марта ишга жойлаштирилган ходимларга қоғоз шаклидаги меҳнат дафтарчалари берилишини тўхтатиш;
- аввал ишлаётганларнинг меҳнат дафтарчасидаги ёзувларни босқичма-босқич электронлаштириш.
Ҳа, майли, яна ярим йил кутсак кутармиз. Асосийси меҳнат дафтарчаларини электронлаштириш бошланганининг ўзи катта ютуқ. Катта қадам. Қолгани бир гап бўлар.
Каналга уланиш: 👇
https://t.me/joinchat/AAAAAEe1KDC7Hm03UPVooQ
