Ўзбек тилида лойиҳаси доирасида ижтимоий роликлар дубляжи
«Ўзбек тилида»
Ёдингизда бўлса, рус блогери тайёрлаган йўл ҳаракати хавфсизлигига оид бир роликни ўзбек тилига дубляж қилган эдим. Ўшанда ўзим учун режа қилиб қўйгандим, имконим бўлса, мана шунақа фойдали ижтимоий роликларни ўзбек тилига таржима қиламан, деб.
Чунки хорижда жуда ҳам даҳшатли ижтимоий роликлар, қисқа метражли фильмлар суратга олинади, одам кўриб мазза қилади. Бизнинг кино ва медиа саноатимиз ҳали у даражага чиқмаган. Ўзимизда суратга олинмаганга яраша, ҳеч бўлмаса яхши хорижий ишларни ўзбек тилига ўгириб, эълон қилсак ҳам ёмон бўлмасди, менимча.
Шунга кўра, «Ўзбек тилида» деб номланган лойиҳа доирасида муаллифлик ҳуқуқи фойдаланиш учун очиқ бўлган ижодий ишларни ўзбек тилида бериб боришга ҳаракат қиламиз. Албатта бошланишига ҳаваскор тарзда дубляж қилинмоқда. Балки кейинчалик профессионал даражага ҳам чиқармиз.
Биринчи дубляж – Австралиянинг Виктория штати транспорт ҳодисалари комиссия томонидан тайёрланган ижтимоий ролик.
Мазкур роликда атиги 5 км/соат тезликни камайтириш орқали ҳалокат оқибатини қай даражада кескин ўзгартириш мумкинлиги кўрсатилган. Тасаввур қиляпсизми, арзимасдек кўринган 5 км/соат тезлик инсон ҳаётини сақлаб қолиши мумкин.
Йўлларда секинроқ юринг. Бу ҳам ўзингизнинг, ҳам ўзгаларнинг ҳаёти учун фойдали.
Роликни кўринг ва ўзингиз хулоса чиқаринг:
👉 @xushnudbek 👈
