Аёллар учун 1146 ишонч телефони ва эркаклар қаршилиги
Manba:Daryo — LIVE
Танзила Норбоеванинг айтишича, Ўзбекистонда эркаклар «қўзғолон» кўтарганмиш. Бор-йўғи бир ишонч телефонига қарши
Тошкентдаги меҳмонхоналарнинг бирида аёллар ҳуқуқлари масаласида ўтказилган давра суҳбатида Ўзбекистон хотин-қизлар қўмитаси раиси Танзила Норбоева қизиқ бир фактни айтди — аёллар учун махсус, тезкор, республика бўйича ягона қисқа рақамли «1146» ишонч телефони ишга туширилишига эркаклар томонидан жиддий қаршиликлар бўлган.
Ишонч телефонлари зўравонлик қурбонига айланган аёллар ва қизларга оғир вазиятдан чиқишга ёрдам бериб, руҳий, ҳуқуқий ҳамда тиббий кўмак беради. Бунда аёлнинг хоҳишига кўра, унинг шахси ва мурожаати сир сақланади. Зарур ҳолларда, жабрдийда аёллар Ўзбекистоннинг барча ҳудудларида ташкил этилаётган Ижтимоий мослашув марказларига (шелтерларга) жойлаштирилади.
Маълумотларга кўра, ҳозирги кунгача мазкур ишонч телефони орқали 7 мингга яқин мурожаат келиб тушган бўлиб, бир кун давомида энг кўпи билан 50—60 тага яқин қўнғироқ амалга оширилган. Хўп, эркаклар бунинг нимасига «қўзғолон» кўтарган?
«Эркаклар «қўзғолони» бўлди — улар аёллар учун махсус ишонч телефонлари ишга туширилишини умуман исташмади. Улар ишонч телефонлари орқали устидан шикоят қилинган эркакларга нисбатан жиноий ишлар қўзғатилишидан хавотир олишди. Биз уларга бу ҳуқуқий-маслаҳат, психологиқ қўллаб-қуввватлов мақсадида ташкил этилганини тушунтирдик. Биз тушкунликка тушган аёлни кўнглини кўтариб, агар муаммо эркак кишида бўлса, у билан ҳам мулоқот ўтказишни кўзлагандик. Мақсадимиз уларни жазога тортиш эмас, балки улар билан суҳбат ўтказиб, тўғри йўлга солиш», — дейди Танзила Норбоева.
Ажойиб «эркаклар» бор-да: хотинини беармон уради, лекин бунинг учун жазоланишдан қўрқади. Ўзи кимдандир калтак еса, қаерга қандай мурожаат қилишни жуда яхши билади, бироқ ўзи калтаклаган хотини унинг устидан кимгадир шикоят қилишини истамайди. Эҳ, «эркак», «эркак»!
