Талабалар контрактини тўлаш бўйича акция натижалари

Акция натижалари ҳақида

Хабарингиз бўлса керак, каналимиз орқали 30 сентябргача давом этадиган талабалар учун махсус акция ташкил қилган эдик. Унга кўра, тадбиркорларимиз илк маротаба @xushnudbek каналида реклама жойлаштириш имконига эга бўлишди. Реклама эвазига эса, эҳтиёжманд талабалардан бирининг контрактини тўлаб бериши талаб этилди.

Тадбиркорлар учун талабалар рўйхати биз томондан тақдим этилди, бунинг учун махсус анкета орқали муштарийлардан сўровлар қабул қилинди. Ўртада шубҳа пайдо бўлмаслиги учун тадбиркорларни бевосита талабаларнинг ўзи билан боғлаб беришга ҳаракат қилдик.

Кўпчилик каналда реклама кўришга ўрганмаган эди, шу сабабли айрим эътирозлар ҳам бўлди. Аммо умид қиламанки, рекламалардан муштарийларга катта зиён етмади.

Шаффофликни таъминлаш мақсадида акция натижалари ҳақида айрим маълумотларни бериб ўтмоқчимиз.

Акция доирасида бугунги кунгача 60 нафар (47 нафар чин етим, 13 нафар отаси вафот этган) талабаларнинг тўлов-шартнома пули тўлаб берилди.

Ҳозирда яна 4 нафар талабанинг контрактини тўлаш жараёнлари кетмоқда.

Тўланган 60 нафар талабанинг 59 нафари кундузги, 1 нафари сиртқи таълимда ўқийди.

Кундузги таълимда 49 нафар талабага 1 йиллик, 10 нафар талабага ярим йиллик контракт тўланди (барчаси стипендияли кўринишда). 1 нафар сиртқи таълим учун ярим йиллик тўлаб берилди.

Курслар кесимида:

1-курс: 22 нафар
2-курс: 11 нафар
3-курс: 18 нафар
4-курс: 7 нафар
5-курс: 2 нафар

Ҳудудлар кесимида:

Фарғона 10
Самарқанд 8
Бухоро 5
Қорақалпоғистон 5
Тошкент вилояти 5
Жиззах 4
Қашқадарё 4
Хоразм 4
Андижон 3
Навоий 3
Наманган 3
Сирдарё 2
Сурхондарё 2
Тошкент шаҳри 2

Умид қиламизки, ушбу талабалар келгусида ўз касбининг моҳир эгалари бўлиб етишади ва жамиятимиз ривожига катта фойдаси тегади!

Изоҳ: Кўпчилик «ахир каналда бунча кўп реклама чиқмади-ку» дея ҳайрон бўлиши мумкин. Ҳа, шундай, чиққан рекламалар сони анча кам, тўланганлар кўп. Бунга бир қанча сабаблар бор.

Аввало айримлар рекламани рад этишиб, шунчаки эҳсон қилишди. Масалан, рўйхатдагиларнинг 80%ига битта компания тўлаб берди ва номи сир қолишини истади. Шунингдек, айрим рекламалар ҳали чиқмади, навбати билан эълон қилинади. Бор гап шу.