Сиёсий партиянинг супер-контрактлар ҳақидаги баёнотига муносабат

Бир баёнот ҳақида

Юртимиздаги бир партиянинг Сиёсий Кенгаши Ижроия қўмитаси котибият мудири, экспертлар гуруҳи раҳбари супер-контрактларнинг миқдорлари қимматлиги ҳақидаги баёнот билан чиқибди (партия номини айтмайман, тағин сайлов олди атайин бизни ерга уриш учун буюртма олган, деб гапириб юришмасин).

Супер-контракт миқдорларининг қимматлиги ва уларни тўлаш тартибига оид таклифларимни 1 ой олдинги «Ҳукуматга талабаларнинг тўлов-контракти бўйича таклифлар» номли постимда батафсил ёзганман, шу сабабли бу ҳақда ортиқча тўхталмоқчи эмасман.

Лекин баёнотдаги 2 та жиҳат жуда қизиқ.

Биринчидан, баёнотда «айни пайтда мамлакатимизда энг кам ойлик иш ҳақи 223 000 минг сўм бўлган бир пайтда» дейилади. Ваҳоланки, 1 сентябрдан Ўзбекистонда энг кам ойлик иш ҳақи деган атама бекор бўлган, унинг ўрнига иш ҳақлари учун «меҳнатга ҳақ тўлашнинг энг кам миқдори» деган атама юритилади ва у 634 минг 880 сўм этиб белгиланган.

Албатта, бу баёнотнинг асосий моҳиятини ўзгартирмайди, лекин шунчаки сиёсий партиянинг котибияти мудири, экспертлар гуруҳи раҳбари юртимизда бўлаётган ўзгаришлардан бехабарлиги мени жуда ҳайрон қолдирди.

Иккинчидан, баёнотда "cупер-контракт нархларини нега бунақа белгиладинглар, бунга ваколатинглар бормиди ўзи", дея Олий ва ўрта махсус таълим вазирлигига мурожаат қилинган. Ваҳоланки, супер-контракт нархларини вазирлик белгилмайди, буни Таълим муассасаларига ўқишга қабул қилиш бўйича Давлат комиссияси ўзининг йиғилиш баённомаси (протокол) билан тасдиқлаб берган. Ушбу комиссияга Бош вазир Абдулла Арипов раҳбарлик қилади.

Юқорида айтганимдай, бу ҳам масала моҳиятига жиддий таъсир қилмайдию, аммо барибир сиёсатчиларимиз бундай баёнотлар бераётганда нега масалани жиддий ўрганиб кўрмас экан, дея ажабланаман холос.

Ҳай, майли. Сайлов олди мана шунақа чиқишлар ва ўзаро медиа-жанглар бўлгани яхши (баёнотда бошқа бир партияга тош ҳам отилган, худдики “таълим сизларнинг ишингиз, бизга унча алоқаси йўқ, нега сизлар жимсизлар” дегандай). Хорижда бундан беш баттарларини ҳам кўп кўрганмиз, партиялар бир-бирини ўта жиддий танқид қилишади, лойдан олиб, балчиққа солишади баъзан.

Фақат бу каби фаоллик ҳар гал сайловга яқин қолганда эмас, ҳар доим бўлса ёмон бўлмасди. Ва яна ўша баёнотда айтилганидай, бу каби чиқишлар шунчаки номига халққа ёқиш учун эмас, масалани чуқурроқ, жиддийроқ таҳлил қилиб, реал таклифлар билан тўлдирилса бир ажойиб иш бўларди. Халқ учун амалда фойда бўларди.

❗️Умуман олганда жорий йил сайловлар қизиқ ўтадиганга ўхшайди, шунга қизиқиб кетяпман ))

Шахсий фикр: супер-контрактни арзонлаштириш йўлини биламан, бунинг учун оддий контрактларни нархини қиммат қилиш керак 😄 (ҳазил, дарров тошбўрон қилманглар яна).

Чунки оддий контракт тўловчиларнинг бирортаси ҳам ўзига сарфланган харажатни қопламайди, давлат ғазнасидан контрактчиларнинг зарарини қоплаб келяпти. Шу сабабли қўшимча юк ноилож супер-контрактчилар гарданига тушяпти. Оддий арифметика бу.

Йўқса 300 млн сўм атрофидаги сумма юриспруденция учун, 200 млн сўм атрофидаги сумма тиббиёт учун ақлга сиғмас даражада қиммат. Пулига яраша арзимайди. Бу энди алоҳида катта мавзу.

👉 @xushnudbek 👈