Сайловларни октябрь ойида ўтказиш таклиф этилмоқда

⚡️Сайловларни октябрь ойида ўтказиш ҳақида қонун лойиҳаси кўриб чиқилмоқда

Бугун Олий Мажлис Қонунчилик палатасининг навбатдаги мажлиси бўлиб ўтди. Унда депутатлар “Сайлов қонунчилиги такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги қонун лойиҳасини биринчи ўқишда кўриб чиқди.

Амалдаги қонунчиликка мувофиқ, Президентлик сайлови, Олий Мажлис Қонунчилик палатасига ҳамда маҳаллий вакиллик органларига сайловлар тегишинча уларнинг конституциявий ваколат муддати тугайдиган йилда — декабрь ойи учинчи ўн кунлигининг биринчи якшанбасида ўтказилади. Бу эса сайловлардан кейинги сиёсий тадбирларни ўтказиш, жумладан, Давлат дастурини қабул қилиш ва бошқа ислоҳотларнинг кечиктирилишига сабаб бўлади, дея таъкидланибди бугунги мажлисда.

Шу боис, қонун лойиҳасига кўра, сайловларни октябрь ойи учинчи ўн кунлигининг биринчи якшанбасида ўтказиш таклиф этилмоқда.

❓Бизда бу қонунга оид айрим саволлар пайдо бўлди. Нима учун қонун лойиҳаси жамоатчиликнинг очиқ муҳокамасига қўйилмасдан, Олий Мажлисга кўриб чиқиш учун киритилган? Ахир бу қонун Бош қомусимиз бўлган Ўзбекистон Конституциясига ўзгариш киритишни талаб этадику! Яна ўша эски ҳолат такрорланяпти шекилли. Бирор жойда матни эълон қилинмаган ва оммавий муҳокама бўлмаган қонун билан Конституцияга ўзгариш киритишмоқчими?

Ёки бирор жойда қонун лойиҳаси матни эълон қилиндию, мен кўрмай қолдимми? Унақа бўлса, олдиндан узр сўрайман. Фақат ўша очиқ эълон қилинган жойга манба беришсин, бир кўриб чиқайлик, агар сир бўлмаса, албатта.

👉 @xushnudbek 👈