Qoidabuzarlikni suratga olish bo‘yicha bahslar

Депутат Расул Кушербаев қоидабузарликни расмга олиб, пул ишлаётганлар бугун 10 минг сўм учун одамларни сотса, эртага 100 минг сўм учун ватанини ҳам сотиши мумкин, буни «казёллар жамияти»га ўхшатиш мумкин деб айтганди.

Шундан сўнг бу мавзу кўпгина муҳокамаларга сабаб бўлди. Кўпчилик муносабат билдирди. Жумладан блогер Шаҳноза Соатова ҳам қоидабузарликларни суратга олиб тарқатишга норозилик билдираётган ҳайдовчиларга мурожаат билан чиққан:

«Ҳаётингизни шу автосиз тасаввур қилолмайсиз. Бошқа ҳақиқатни кўрмайсиз. Пиёдаларни одам ўрнида кўрмайсиз, «неудачник» деб сўкасиз. Муваффақиятингизни шу темир билан ўлчайсиз!

Қонун устувор давлат дейсиз, ўзингиз тартибга риоя қилишга келганда шарт қўясиз.

Рулга ёпишиб олгансиз, болангизни боғча ё мактабининг эшигини тагигача аравангизда олиб боришингиз керак, пиёда келаётган болаларга қиш куни лой сачратиб, ёзда тупроқ ичида қолдириб. Тез ёрдам, ўт ўчириш машиналарининг йўлини ҳам тўсиб парковка қилиб кетаверасиз, сизга нима?! Болалар майдончаси, йўлакларни эгаллаб олгансиз: бир қарич жой учун ёқа бўғишасиз!

Мен қоидабузарларнинг жазоланиши тарафдориман, чунки бугун 3 миллион автомобиль эртага 5-10 миллионга чиққанида аҳволни умуман ўнглаб бўлмаслигини тушунаман, деб ёзган у.

Бугун Масс-медиа фонди васийлик кенгаши раиси Комил Алламжонов телеграм каналида бу ҳақда пост қолдирибди:

«Жамият қонунбузарликларни беркитиши керак эмас. Бу ҳақида гапирган одамлар «козёл»га чиқиши хато. Мана яқинда бир одам кичкина бир қизни ўғирлаб кетаётган пайт, бу ҳолат ҳам одамлар ёрдамида, уларнинг видеолари орқали бартараф этилди. Демак, улар ҳам «козёл»ми? Логика шундай бўляпти. Албатта, одамлар орасида солидарность бўлиши керак, лекин қонун-қоида бузилишини яширишда эмас. Биз тартибли ва ҳуқуқий жамият қуришга интилишимиз, уни тарғиб қилишимиз керак. Ўзи шундоқ ҳам кўп масалалар «не по закону, а по понятиям» ҳал қилинадиган бўлиб қолди».