Прописка тақиқи сабабли уйидан айрилиш хавфи

​​Ўз уйида ўзи бегоналар

#муштарийдан_савол

«Assalomu alaykum, Xushnudbek aka.

Sizga bir savol bilan murojaat qilyapman. Mening tog'am Chiroqchida yashaydi u kishining Toshkentda uyi bor uyini bir tanishining nomiga olgan edi yaqinda usha odam vafot etib uy usha odamning bolalariga me'ros sifatida o'tdi. Bundan tashqari usha o'lgan odamning nomida tog'amni uyidan tashqari 14ta odamning uy va mashinalari bor ekan. Endi usha odamning bolalari uyni tog'amni nomiga o'tkazishni paysalga solib cho'zib yuribdi. Shu holatda sudga berib usha uylarni haqiqiy egalari foydasiga hal qilsa bo'ladimi.

Javobiz uchun oldindan rahmat!»

ЖАВОБ: Худога яқин бўлиб, дуо қилиш керак ©

Изоҳ: бундай вазиятда марҳумнинг фарзандларига Худо инсоф бермаса, яъни улар ўзганинг ҳаққи бир куни барибир бурнидан булоқ бўлиб чиқишини тушуниб етмаса, қонуний йўл билан бирор натижага эришиш жуда ва жуда қийин. Яхши гапириб, катта ёшли, кайвониларни ўртага қўшиб, керак бўлса, ялиниб, ёлвориб, бир амаллаб тезда уйни оволиш керак.

Аммо, минг афсуски, тоғангиз олдида ҳали яна бошқа муаммо ҳам бор. Яъни марҳумнинг фарзандларига инсоф кириб, уйни беришга рози бўлишган тақдирда ҳам, тоғангиз уйини яна бировнинг номига олишга мажбур. Чунки ҳали иккиламчи бозордан пропискаси йўқ фуқаролар учун уй олди-сотди қилишга рухсат берилмади (Президент Фармонидаги банд эса ўтган йили бажарилмади, бунга бирорта масъул изоҳ ҳам бермади, нима учун давлат дастуридаги вазифани бажаришмаганини тушунтиришмади, хуллас, «ўрага сичқон тушди - гулдур-гуп» принципи буёғи).

P.S.: яна ўша эски гап – ҳукумат мантиқсиз қарорлар чиқарса, халқ унга мослашиш учун бир нечта вариантларни ўйлаб топади. Аммо бу вариантлар ёки коррупция, ёки жиноят, ёки эртага ўзига катта муаммо олиб келадиган бошқа бир усул бўлади. Мантиқсиз қарорларини тезроқ бекор қилмас экан, халқ юқоридаги саволда таъкидланган ҳолатга тушиб, ўз мулки учун ўзгалар олдида ялиниб, ёлворишга мажбур бўлади ёки бутунлай мулкидан айрилиб, кўчада қолиши ҳам мумкин. «Мулк ҳуқуқи» деган тушунча эса бир чеккада ҳўнг-ҳўнг йиғлаб тураверади.

Ўз пешона тери билан, минг қийналиб топган пулига ўзгаларнинг номига уй сотиб олишга мажбур бўлиб (мантиқсиз тақиқлар туфайли), ҳар куни юрагини ҳовучлаб яшаётган юртдошларимиз сони оз эмас. Минг афсус. Миллионлаб афсус...

Хулоса эса ўзингиздан.

Каналга уланиш:
👉 @xushnudbek 👈