Ўзбекистон хорижлик фотограф Matilde Gattoni нигоҳида

​​«Ўзбекистон - хорижликлар нигоҳида» рукнидан: 2002 йилги умид ва 2019 йилги натижа

Кеча Instagram'нинг расмий саҳифасига италиялик фотограф Matilde Gattoni томонидан олинган Тошкент фотосурати жойланганини кўрган бўлсангиз керак.

1974 йили Миланда туғилган ушбу фотограф ижтимоий репортажлари билан анча машҳур экан. Унинг суратлари Time, The Financial Times, Der Spiegel, The Observer, The Guardian каби нашрларда бериб борилар экан.

Matilde Gattoni илк марта 2002 йилда Ўзбекистонга сафар қилиб, олган суратлари асосида покистонлик журналист Ahmed Rashid билан ҳамкорликда «Uzbekistan, 10 years after independence» деб номланган китоб чиқарган экан. «Ушбу китобда Ўзбекистоннинг СССРдан мустақилликка эришгач тутган ижтимоий йўли ва Марказий Осиёнинг энг қудратли давлатларидан бирига айланиш келажаги тасвирланган» дейилади Жаҳон фотографлар ташкилотининг хабарида.

Matilde Gattoni 2019 йилнинг март ойида яна бир бор Ўзбекистонга келибди. Аммо энг қизиғи 17 йил олдин «келажакда Марказий Осиёнинг энг қудратли давлатларидан бири бўлади» деган фотограф, 2019 йилдаги Тошкентдан тайёрлаган репортажига «Марказий Осиёнинг Пхеньяни» деб ном берибди (маълумот учун: Пхеньян шаҳри Шимолий Корея пойтахти). Яъни Тошкентни Пхеньянга, Ўзбекистонни Шимолий Кореяга қиёслаган.

Жумладан, у фоторепортажларига қуйидагича изоҳ берган:

«Сўнгги 28 йил ичида Tошкент дунёдаги энг сирли ва диктатура давлатларидан бирининг пойтахти бўлган.

Ўзбекистон ҳукумати сиёсий рақибларини мунтазам тақиб қилди, диний арбобларни қамоққа ташлади ва юз минглаб фуқароларни, шу жумладан болаларни мажбурий меҳнатга юборди. Mаҳаллий аҳолининг мамлакатдан чиқиб кетишига йўл қўйилмади, ҳукумат Ғарб қадриятлари ва чет эллик журналистларнинг фаолиятини мутлақо тақиқлади.

Узоқ муддат давлатни бошқарган раҳбарнинг вафотидан кейин Ўзбекистон эҳтиёткорлик билан замонавий дунёга чиқа бошлади. Биз янги сиёсат юритилишни бошлагач, Tошкентга биринчилардан бўлиб юборилган мухбирлар бўлдик.

Биз сафаримиз давомида ўнлаб йиллар давомида ҳукм сурган тоталитаризм ва шахсга сиғиниш йўқолиб, одамлар эркинликни татиб кўришни бошлаган сюрреалистик шаҳар ҳаётининг гувоҳи бўлдик», деб ёзади италиялик фотожурналист Matilde Gattoni.

Мана шунақа гаплар. Биз ўзимизни қандай баҳолаймизу (баҳолаганмизу), хорижликлар Ўзбекистон ҳақида қандай тасаввурга эга, булар икки ўзга олам. Халқаро имиджимизни яхшилаш устида ҳали олдинда бизни анчайин оғир меҳнат кутиб турибди.

P.S.: суратда Тошкент ҳақида тайёрланган фоторепортаждан лавҳа.

👉 @xushnudbek 👈