Mustaqillik va Alisher Navoiy yili
Xushnudbek.uzMatn1 daqiqa0tahrirlanganМустақиллик ва Навоий
Алишер Навоий сиймоси ҳақида гап кетса, энг аввало мустақиллигимиз билан боғлиқ бир ҳолат ёдимга тушади.
Биласиз, юртимизда йилларга турлича ном бериш анъанаси бор. Кўпчилик йилларнинг бундай номланиши 1997 йилдан бошланган деб ўйлашади. Лекин ҳужжатлардан кўриш мумкинки, бу анъана ҳали юртимиз мустақил бўлмасдан аввал бошланган.
1991 йил 29 январь куни Ўзбекистон Совет Социалистик Республикасининг Президенти Ислом Каримов «Алишер навоийнинг 550 йиллигини нишонлаш тўғрисида»ги ПФ-139-сонли Фармонга имзо чекади. Фармон матнига эътибор беринг:
«Буюк шоир, мутафаккир, давлат ва жамоат арбоби Алишер Навоий таваллудининг 550 йиллиги нишонланиши муносабати билан меҳнаткашлар ва жамоаларнинг таклифларини инобатга олиб:
— 1991 йил Ўзбекистон Совет Социалистик Республикасида Алишер Навоий йили деб эълон қилинсин;
— юбилей тантаналари шу йилнинг сентябрь ойида ўтказилсин».
Эътибор берган бўлсангиз, фармон январь ойида имзоланган. Лекин юбилей тантаналарини негадир сентябрь ойида ўтказиш режалаштирилган. Қарангки, юбилей танталари белгиланган сентябрь ойида Ватанимиз мустақилликка эришиб бўлган эди! Бу оддий тасодифмикин?
Менимча, буюк бобокалонимизнинг юбилейлари айнан мустақилликнинг илк кунларига тўғри келгани, шунчаки тасодиф эмас. Бунда ҳам рамзий маъно бўлса керак.
👉 @xushnudbek 👈
