Кечки мутолаа лойиҳаси бир ойлик фаолиятидан сўнг тўхтатилди

Ҳурматли китобхон. Бугун «Кечки мутолаа» лойиҳаси бошланганига роппа-роса 1 ой тўлди. Илк ҳикоя 20 январь куни берилган эди.

Ўтган давр мобайнида бугунги билан қўшиб ҳисобласак, 32 та ҳикоя эълон қилинди. Ҳар куни. Кечки пайт. Истисноларсиз.

1 ой ичида ҳикоялар жами 1 ярим миллион мартага яқин ўқилди. Ҳар бир ҳикоя ҳақидаги пост ўртача 45 минг киши томонидан кўрилди.

Умуман олганда, ушбу лойиҳадан ўзимнинг кўнглим тўлди. Ҳеч бўлмаса 1 киши шу лойиҳа туфайли адабиёт билан яна қайта ошно тутинган бўлса, ҳеч бўлмаса 1 киши ҳар куни мутолаа қилишни одатга айлантирган бўлса, шунинг ўзи мен учун кифоя.

Лекин айрим техник сабаблар билан ушбу лойиҳага маълум муддат танаффус бермоқчиман. Ваъда бераманки, лойиҳа албатта яна давом этади.

Маслаҳатим ва илтимосим: мутолаани тўхтатиб қўйманг. Мустақил равишда интернетдаги асарларни ёки уйингиздаги жавонда турган китобларни ўқишни давом эттиринг. Ҳар куни атиги 10 дақиқа вақт ажратсангиз кифоя. Дангасалик қилманг.

Яхши лойиҳаларда кўришгунча деймиз...