Эйфориядан кейин: Президент билан учрашув таассуротлари

Эйфориядан кейин
(эски постнинг сал таҳрирлангани)

Бугун яна янги тонг отди. Янги кун бошланди. Кечаги кун эса... тугади.

Қани энди ҳар бир кунимиз кечагидай байрам бўлса... Президент билан учрашдик, суҳбатлашдик, селфига тушдик, интернетда ҳамма шу ҳақида гапирди, табриклару мақтовларни эшитиб мойдай эридик.

Хуллас, хурсандликдан теримизга сиғмай кетдик... Ахир ҳар куни ҳам Сизда бундай имконият бўлавермайди-ку.

Лекин ҳаёт фақат қувончдан иборат эмас ва ҳар куни кечагидай яшай олмаймиз. Бир ухлаб тургандан кейин, эйфориялар тарқади, ҳаяжонлар кетди. Энди яна келган жойидан давом эттирамиз.

Аввалги принципимиз қандай бўлса, ўша принципни аслича сақлаб қоламиз, керак бўлса олдингидан ҳам кучайтирамиз.

Бизни кузатишда давом этинг... Ва дуоларингизда унутманг, илтимос.

Танқидларга келсак, уларни келгусида албатта инобатга олишга ҳаракат қиламан. Хатоларимиз бор бўлса, уни шахсиятга ўтмасдан тўғри тушунтиришса, бу жуда ажойиб-ку! Соф ниятда бизга кўзгу тутадиган шундай дўстларимиз борлиги учун беҳисоб шукр.

Айтганча, кеча табрик йўллаган барча инсонларга чексиз миннатдорлик билдираман, барчага алоҳида жавоб ёза олмаганим учун узр.

P.S.: баъзан бошимизга бирор кичикроқ синов, мушкуллик келса, дарров тушкунликка тушиб қоламиз, майда нарсалардан ҳам фожиа ясай оламиз. Аммо қувончли кунларимизни жуда оддий қабул қиламиз, худди ҳар кунимиз шундай бўладигандай. Аслида бахтли кунларимиздан ҳам максимум лаззатланишни ўрганишимиз керак, бунинг айби йўқ. Чунки бахтли кунларимиз ҳам ғанимат. Умримиз ғанимат...

👉 @xushnudbek 👈