Ўзбекистон Кубоги финали ва футболдаги манфаатлар

Эски мавзу — эсга тушиб қолди.

Футбол бўйича бу йилги Ўзбекистон Кубоги финалида грузиялик тренер қўл остидаги, алламбало легионерлари бор, миллиардер Алишер Усмоновнинг назаридаги «Пахтакор» Олмалиқнинг АГМК футбол клубига ютқазиб қўйди. Ана сенсация! «Пахтакор» мухлислари грузиялик тренердан хафа, уни «физрук» деб ҳақоратлаган. «Пахтакор»ни ёмон кўрадиганлар эса «ҳалол ўйин бўлгани ҳамон «Пахтакор» яна ютқазди!», деб хурсанд бўлган...

Лекин бу, менимча, сенсация эмас, хурсанд бўладиган жойи ҳам йўқ, назаримда. Биринчидан, «Пахтакор» бу ўйингача Осиё Чемпионлар лигаси йўлланмасини нақд қилиб бўлгани аниқ эди, АГМК эса фақат Кубок финалида ғалаба қозонсагина ОЧЛда ўйнарди. Иккинчидан, «Пахтакор» — Алишер Усмоновга алоқадор SFI Management Group’га тегишли клуб, компания бу жамоани ўтган йили сотиб олган. Худди ўша йили шу компанияга Бекободдаги Ўзбекистон металлургия комбинати ишончли бошқарувга топширилган. Бу комбинат Бекободдаги «Металлург» футбол клуби ҳомийси ҳисобланади (бу жамоа бу йил «Пахтакор» билан тўрт марта ўйнаб, умумий 11:0 ҳисобида ютқазди, айни вақтда «Пахтакор»нинг унча-мунча рақибларининг оёғидан тортиб қолган).

SFI Management Group’га 2018 йилда Олмалиқ кон-металлургия комбинати ҳам ишончли бошқарувга топширилди (Алишер Усмонов ҳам ўзидан-ўзи Олмалиқдаги университет очилишига келиб қолмайди). Олмалиқ кон-металлургия комбинати эса Ўзбекистон Кубоги финалида «Пахтакор» гўёки сенсацион тарзда ютиб қўйган АГМК футбол клубининг ҳомийси ҳисобланади (эгаси деса ҳам бўлади — клуб билан комбинат номи бир хил-ку). Шундай қилиб, келаси йилги Осиё Чемпионлар лигасида SFI Management Group’га алоқадор иккита клуб ўйнайди.

Бирининг (грузиялик) мураббийи ўзгармаса керак. Иккинчисига эса, кўпчилик тахмин қилаётганидек, Миржалол Қосимов бош мураббий этиб тайинланса керак. Ростдан ҳам шундай бўлса, АГМК яна гўёки сенсацион тарзда Кубок ярим финалида Миржалол Қосимовнинг ҳозирги иш жойи — «Бунёдкор»ни мағлуб этиб қўйгани бежиз эмаслиги ойдинлашади. Ростда — тарқалиб кетиш хавфи остида турган, ҳеч кимга кераги йўқ клубга ОЧЛда нима бор?

Энди буёғига кўп нарсалар шунақа бўлади. Шекилли.

https://t.me/joinchat/AAAAAEG2GQMHhMdalJO5IQ