Депутатлар фуқаролик бериш тўғрисидаги қонунни қабул қилди
Депутатлар минглаб юртдошимизга фуқаролик беришни назарда тутадиган қонунни қабул қилди
Олий Мажлис Қонунчилик палатасининг 2020 йил 18 февралда ўтказилган навбатдаги мажлисида «Ўзбекистон Республикасининг Фуқаролиги тўғрисида»ги қонун лойиҳаси муҳокама қилинди.
Статистика маълумотларига кўра, 1991 йил сентябрь ойидан бугунги кунга қадар 8249 нафар фуқаролиги бўлмаган шахс Ўзбекистон фуқаролигига қабул қилинган. Уларнинг асосий қисми — 7765 нафари (94 фоизи) 2016 йил декабрь ойидан 2019 йил июль ойига қадар Ўзбекистон Республикаси фуқаролигига қабул қилинган.
Қонун лойиҳасида 1995 йил 1 январга қадар Ўзбекистон ҳудудига кириб келган ва доимий пропискага ўтган, хорижий давлат фуқаролигини қабул қилмаган ҳамда ушбу Қонун кучга кирган кунга қадар Ўзбекистонда яшаш гувоҳномаси асосида истиқомат қилган шахс, истак билдирган тақдирда Ўзбекистон фуқароси деб тан олиниши назарда тутилган.
Ҳисоб-китобларга кўра, шу тариқа 50 мингга яқин юртдошларимизнинг фуқаролик билан боғлиқ узоқ йиллардан буён ечилмасдан келаётган муаммоси ҳал этилиши кўзда тутилган.
Муҳокамалардан сўнг депутатлар томонидан қонун қабул қилинди ва Сенатга юбориладиган бўлди.
Энди сенаторлар маъқуллаб, Президент имзолагандан сўнг, ушбу қонун кучга киради.
👉 @xushnudbek 👈
