Талабалар ётоқхонаси ва ижара муаммолари

Талабалар ётоқхонаси ҳақида

Маълумотларга қараганда, Тошкент шаҳрида 173 та талабалар ётоқхонаси мавжуд ва уларга 47,4 минг талаба жойлашиши мумкин. Лекин Тошкент шароитида бу жуда кам, ётоқхонага эҳтиёжмандларнинг 40%ига ҳам етмайди.

75 минг атрофидаги талабалар ижараларда яшар экан. Ижара топиш, пропискага қўйиш, ҳар ой ижара ҳақини тўлаш муаммолари ҳақидаку соатлаб гапириш мумкин.

Янги ўқув йили бошланиши билан ётоқхонага жойлашиш муаммоси доим талабаларни қийнаб келади. Деканга ялин, проректорга кир, ректордан илтимос қил ва ҳ.к. Талабалар ётоқхонасига жойлашиш бўйича аниқ Низом ёки йўриқнома бормикин-а, қидириб топа олмадим. Балки бордир.

Умуман олганда магарки муаммо мавжуд экан, демак унинг ечимлари ҳақида қайғуриш керак. Энг аввало талабалар ётоқхонасига жойлаштиришнинг расмий тартибини янгидан ишлаб чиқиш ва ҳамма талабаларга етказиш керак. Бу шундай тартиб бўлсинки, ҳозирги норозиликлар сезиларли камайсин. "Фақат таниш-билиш билан, "соққа" билан жой олиш мумкин, биз бечоралар кўчада қолдик" деган таъналарни нисбатан йўқотадиган тартиб бўлсин.

Бундан ташқари ётоқхоналар сонини кўпайтириш, улардаги ўринларни кенгайтириш ҳақида ҳам ўйлаш зарар қилмайди.

ОТМлар ҳудудини шаҳар чеккасидаги жойларнинг ҳисобига бўлса ҳам кенгайтириш ва замонавий кампуслар яратиш керак. Токи талабалар бир жойда ўқиб, бир жойда яшашсин. Транспорт харажатлари ва ташвишлари билан овора бўлишмасин.

Талабаларнинг вақтинчалик пропискага қўйиш тизимини ҳам такомиллаштириш, яъни енгиллаштириш керак, менимча.

Ҳозирча шулар. Яна фикрлар келса ўртоқлашаман. Ётоқхонадан жой олишда ҳақиқий эҳтиёжмандларга омад тилайман!

Каналга уланиш: 👇
https://t.me/joinchat/AAAAAEe1KDC7Hm03UPVooQ